വാഷ്ങ്ടണ്‍: സംശയകരമായ സാഹചര്യത്തില്‍ വൈറ്റ് ഹൗസിനു സമീപം ബൈക്കില്‍ അഭ്യാസപ്രകടനം നടത്തിയയാളെ അമേരിക്കന്‍ രഹസ്യാന്വേഷണ ഉദ്യോഗസ്ഥര്‍ അറസ്റ്റു ചെയ്തു. യുവാവിനെക്കുറിച്ചുള്ള വിവരങ്ങള്‍ പുറത്തുവിട്ടിട്ടില്ല.

ബൈക്കുമായി യുവാവ് വൈറ്റ് ഹൗസിന്റെ വേലിക്കടുത്തേക്ക് കുതിക്കുകയായിരുന്നെന്ന് പൊലിസ് പറഞ്ഞു. ഇയാള്‍ക്കെതിരേ ക്രിമിനല്‍ കേസ് രജിസ്റ്റര്‍ ചെയ്തിട്ടുണ്ട്. എന്നാല്‍ യുവാവിന്റെ കൈയില്‍ ആയുധങ്ങളോ മറ്റോ ഇല്ലായിരുന്നു. സംഭവ സമയം ട്രംപ് വൈറ്റ് ഹൗസില്‍ ഇല്ലായിരുന്നു.

കഴിഞ്ഞ പത്താം തീയതി മൂന്നു പേര്‍ ചേര്‍ന്ന് വൈറ്റ് ഹൗസിലെ വേലി തകര്‍ക്കാന്‍ ശ്രമം നടത്തിയിരുന്നു. ഇവരെയും സുരക്ഷാ സേന അറസ്റ്റു ചെയ്യുകയായിരുന്നു. വൈറ്റ് ഹൗസിലേക്ക് വാഹനങ്ങള്‍ പ്രവേശിക്കുന്ന കവാടത്തിനു സമീപമായിരുന്നു അന്ന് യുവാക്കള്‍ അതിക്രമിച്ചു കടന്നത്. ഈ സമയം ട്രംപ് ഇവിടെ ഉണ്ടായിരുന്നു. കഴിഞ്ഞ വര്‍ഷങ്ങളിലായി വൈറ്റ് ഹൗസിലേക്ക് അനധികൃതമായി കടക്കുന്നവരുടെ എണ്ണം വര്‍ധിച്ചിരിക്കുകയാണ്.