ന്യൂഡല്‍ഹി: കഴിഞ്ഞ ദിവസം പാകിസ്താനില്‍ കാണാതായ മുസ്‌ലിം പണ്ഡിതര്‍ പാക് രഹസ്യാന്വേഷണ വിഭാഗത്തിന്റെ കസ്റ്റഡിയില്‍. ഡല്‍ഹിയിലെ ഹസ്‌റത്ത് നിസാമുദീന്‍ ദര്‍ഗ മേധാവി സയ്യിദ് ആസിഫ് അലി നിസാമിയെയും(80) ബന്ധു നസിം അലി നിസാമിയെയും(60)ആണ് പാകിസ്താനില്‍ പിടിയിലായത്. ഇവരെ ഈമാസം 20 ന് തിരിച്ചയക്കുമെന്ന് പാകിസ്താന്‍ അറിയിച്ചു. ലാഹോറിലെ  പ്രശസ്തമായ ദത്താ ദര്‍ബാര്‍ സന്ദര്‍ശിക്കാനാണ് ഇരുവരും ഇന്ത്യയില്‍ നിന്ന് പോയത്. ഇവരെ വിമാനത്താവളത്തില്‍ കാണാതായെന്നാണ് ബന്ധുക്കള്‍ക്ക് കിട്ടിയിരുന്ന വിവരം. എന്നാല്‍ ഇവര്‍ പാക് രഹസ്യാന്വേഷണ വിഭാഗത്തിന്റെ കസ്റ്റഡിയിലാണെന്നാണ് പേരുവെളിപ്പെടുത്താത്ത പാക് വാര്‍ത്താ ഏജന്‍സിയെ ഉദ്ധരിച്ച് പി.ടി.ഐ റിപ്പോര്‍ട്ട് ചെയ്തത്.  
മാര്‍ച്ച് എട്ടിനാണ് ഇരുവരും കറാച്ചിയിലേക്ക് പോയത്. ഇവിടെ നിന്ന് ലാഹോറിലെ ബാബാ ഫരീദ് പള്ളിയിലെത്തിയിരുന്നു. തുടര്‍ന്ന് 14ന് ഇരുവരും ലാഹോറിലെ പ്രശസ്തമായ ദത്താ ദര്‍ബാര്‍ സൂഫി പള്ളിയിലെത്തി. 15ന് വൈകീട്ട് 4.30ന് കറാച്ചിയിലേക്ക് മടങ്ങാനായി ഇരുവരും ലാഹോര്‍ വിമാനത്താവളത്തില്‍ എത്തി. ഇവിടെ വച്ച് ചില രേഖകളില്‍ വ്യക്തത വരുത്താനുണ്ടെന്ന് പറഞ്ഞ് നസിം നിസാമിയെ ഉദ്യോഗസ്ഥര്‍ തടഞ്ഞുവച്ചു. എന്നാല്‍ സയ്യിദ് ആസിഫ് അലി നിസാമിയെ യാത്രതുടരാന്‍ അനുവദിക്കുകയും ചെയ്തു. തുടര്‍ന്ന് ഇരുവരുടെയും മൊബൈല്‍ ഫോണുകള്‍ നിശ്ചലമായി.
കറാച്ചി വിമാനത്താവളത്തില്‍ ഇറങ്ങിയ ശേഷമാണ് ഇരുവരെയും കാണാതായതെന്നാണ് വിദേശ കാര്യമന്ത്രി സുഷമ സ്വരാജ് അറിയിച്ചത്. അതേസമയം പിതാവിനെയും ബന്ധുവിനെയും ഇന്ത്യയിലേക്ക് തിരിച്ചയക്കാന്‍ പാക് സര്‍ക്കാര്‍ അടിയന്തര നടപടി സ്വീകരിക്കണമെന്ന് സയ്യിദ് ആസിഫ് അലി നിസാമിയുടെ മകന്‍ സാജിദ് അലി നിസാമി അഭ്യര്‍ഥിച്ചു.