ന്യൂഡല്‍ഹി: അജ്മീര്‍ ദര്‍ഗാശരീഫിലുണ്ടായ സ്‌ഫോടനക്കേസില്‍ കുറ്റക്കാരെന്നു കണ്ടെത്തിയവര്‍ക്കുള്ള ശിക്ഷ പ്രഖ്യാപിക്കുന്നത് കോടതി വീണ്ടും നീട്ടി. ഇത് രണ്ടാംതവണയാണ് ശിക്ഷ പ്രഖ്യാപിക്കുന്നത് ജയ്പൂരിലെ പ്രത്യേക എന്‍.ഐ.എ കോടതി നീട്ടുന്നത്.
കുറ്റക്കാര്‍ക്കുള്ള ശിക്ഷയുടെ കാഠിന്യം സംബന്ധിച്ച് ഇരുവിഭാഗത്തിന്റെയും വാദങ്ങള്‍ കേട്ടശേഷമാണ് ഇന്നലെ വിധിപ്രഖ്യാപനംനീട്ടിയത്. ഈ മാസം 22ന് വിധി പ്രസ്താവിക്കുമെന്ന് കോടതി അറിയിച്ചു.
ദുരൂഹസാഹചര്യത്തില്‍ കൊല്ലപ്പെട്ട ആര്‍.എസ്.എസ് പ്രചാരക് സുനില്‍ ജോഷി, സംഘപരിവാര്‍ പവര്‍ത്തകരായ ഭവേശ് പട്ടേല്‍, ദേവേന്ദ്ര ഗുപ്ത എന്നിവരെ കുറ്റക്കാരായി ഈ മാസം എട്ടിനു കോടതി കണ്ടെത്തിയിരുന്നു. കേസില്‍ സ്വാമി അസിമാനന്ദ, ലോകേഷ് ശര്‍മ, ചന്ദ്രശേഖര്‍, ഹര്‍ഷദ് സോളങ്കി, മെഹുല്‍കുമാര്‍, മുകേഷ് വാനി, ഭരത് മോഹന്‍ രതേശ്വര്‍ എന്നിവരെ വെറുതെവിടുകയുംചെയ്തിരുന്നു. കേസില്‍ പ്രതികളെന്നു കണ്ടെത്തിയ മലയാളിയായ സുരേഷ് നായരുള്‍പ്പെടെ മൂന്നുപേരെ ഒളിവില്‍കഴിയുന്നവരായി നേരത്തെ പ്രോസിക്യൂഷന്‍ പ്രഖ്യാപിച്ചിരുന്നു.
ആത്മീയ ഗുരു അജ്മീരിലെ ഖാജാ മുഈനുദ്ദീന്‍ ചിശ്തി അന്ത്യ വിശ്രമംകൊള്ളുന്ന ദര്‍ഗാ ശരീഫിനു സമീപം 2007 ഒക്ടോബര്‍ 11ന് റമദാനിലുണ്ടായ സ്‌ഫോടനത്തില്‍ മൂന്നുേപരാണ് മരിച്ചത്.