കൊച്ചി: മിഷേലിന്റെ മൃതദേഹം കണ്ടെത്തിയപ്പോഴുള്ള ചിത്രമെന്ന പേരില്‍ സാമൂഹ്യമാധ്യമങ്ങളില്‍ പ്രചരിക്കുന്നത് വ്യാജചിത്രമാണെന്ന് പൊലിസ്. മിഷേലിന്റെ മൃതദേഹം കണ്ടെടുക്കുമ്പോള്‍ ധരിച്ചിരുന്നത് ചുവന്ന ടീഷര്‍ട്ടാണെന്നും പൊലിസ് ശേഖരിച്ച സി.സി.ടി.വി ദൃശ്യങ്ങളില്‍ കാണുന്നത് ചുരിദാര്‍ ധരിച്ച മിഷേലിനെയാണെന്നും ഇതിലെ ദുരൂഹത പൊലിസ് അന്വേഷിച്ചില്ലെന്നുമാണ് സാമൂഹ്യമാധ്യമങ്ങളില്‍ ചിത്രങ്ങള്‍ സഹിതം പ്രചരിച്ച വാര്‍ത്ത.
എന്നാല്‍, മൃതദേഹം കണ്ടെടുക്കുമ്പോള്‍ ചിത്രങ്ങളും വിഡിയോയും പകര്‍ത്തിയിട്ടുണ്ടെന്നും അത് മിഷേലിന്റെ കുടുംബാംഗങ്ങളും കണ്ടതാണെന്നും അതില്‍ ചുരിദാര്‍ തന്നെയാണ് ധരിച്ചിട്ടുള്ളതെന്നും പൊലിസ് പറഞ്ഞു. വ്യാജ ചിത്രങ്ങള്‍ പ്രചരിപ്പിക്കുന്നവര്‍ക്കെതിരേ കേസെടുക്കുന്ന കാര്യം ആലോചിക്കുന്നതായും പൊലിസ് വ്യക്തമാക്കി.