തെന്മല: ഹാരിസണ്‍ മലയാളം പ്ലാന്റേഷനില്‍ തൊഴിലാളികളുടെ സമരം 56-ാം ദിവസത്തിലേക്ക് കടന്നു. സത്യഗ്രഹ സമരം നടത്തുന്ന തൊഴിലാളികള്‍ എസ്റ്റേറ്റ് ഓഫിസ് ഉപരോധസമരവും തുടരുകയാണ്. ഹാരിസണ്‍ പ്ലാന്റേഷന്‍ നാഗമല എസ്റ്റേറ്റിലെ തൊഴിലാളികളാണ് സമരം നടത്തുന്നത്.
രണ്ടുമാസമായിമായി തൊഴിലാളികള്‍ വിവിധ ആവശ്യങ്ങള്‍ ഉന്നയിച്ച് യോഗങ്ങളും പ്രകടനങ്ങളുംധര്‍ണയും നടത്തുകയായിരുന്നു. എന്നാല്‍ അനുകൂല നടപടിയെടുക്കാന്‍ മാനേജ്‌മെന്റ് തയാറാകാത്തതിനാലാണ് തൊഴിലാളികള്‍ സത്യഗ്രഹ സമരത്തിലേക്കു് കടന്നത്.
നാഗമല എസ്റ്റേറ്റിലെ കുറവന്താവളം ഡിവിഷന്‍ ഓഫിസിന് മുന്നിലായിരുന്നുസത്യാഗ്രഹ സമരം തുടങ്ങിയത്. പിന്നീട് നാഗമല എസ്റ്റേറ്റ് ഓഫിസിന് മുന്നില്‍ സമരം ആരംഭിക്കുകയായിരുന്നു. ചൊവ്വാഴ്ച എസ്റ്റേറ്റ് ഓഫിസ് ഉപരോധസമരം പ്ലാന്റേഷന്‍ വര്‍ക്കേഴ്‌സ് യൂനിയന്‍ (സി.ഐ.ടി.യു) ജില്ലാ ജനറല്‍ സെക്രട്ടറി എസ് ജയമോഹന്‍ ഉദ്ഘാടനം ചെയ്തു. ട്രേഡ് യൂനിയന്‍ നേതാക്കളായ ആര്‍. പ്രദീപ്, വി.എസ് മണി, സി. ചന്ദ്രന്‍, കമലാസനന്‍ സംസാരിച്ചു.
താല്‍ക്കാലിക തൊഴിലാളികളെ സ്ഥിരപ്പെടുത്തുക, ആശ്രിതര്‍ക്ക് താല്‍ക്കാലിക തൊഴില്‍ നല്‍കുക, ഗ്രാറ്റുവിറ്റി കുടിശിക നല്‍കുക, ശമ്പളം മസ്റ്റര്‍ ഓഫിസ് വഴി വിതരണം ചെയ്യുക തുടങ്ങിയ ആവശ്യങ്ങളുന്നയിച്ചാണ് സമരം. സംയുക്ത ട്രേഡ് യൂനിയന്‍ നേതൃത്വത്തില്‍ നടക്കുന്ന സമരത്തില്‍ പങ്കെടുത്തതിന് സി.ഐ.ടി.യു നേതാവ് കമലാസന നെയും രണ്ട് ഐ.എന്‍.ടി.യു.സി പ്രവര്‍ത്തകരായ തൊഴിലാളികളെയും മാനേജ്‌മെന്റ് സസ്‌പെന്റ് ചെയ്തു.
ഹാരിസണ്‍ മാനേജ്‌മെന്റിന്റെ തൊഴിലാളി വിരുദ്ധ നിലപാടില്‍ പ്രതിഷേധം ശക്തമാണ്. കുറവന്താവളം ഡിവിഷനില്‍ വര്‍ഷങ്ങളായി ജോലി ചെയ്യുന്ന താല്‍ക്കാലിക തൊഴിലാളികളെ സ്ഥിരപ്പെടുത്താന്‍ മാനേജ്‌മെന്റ് മനപൂര്‍വം തയാറാകുന്നില്ല.
മറ്റ് എസ്റ്റേറ്റുകളില്‍ താല്‍ക്കാലികക്കാരെ സ്ഥിരപ്പെടുത്തുമ്പോഴാണ് നാഗമല എസ്റ്റേറ്റില്‍ അര്‍ഹരായ തൊഴിലാളികളെ അവഗണിക്കുന്നത്. തൊഴിലാളികളുടെ തൊഴിലവസരം നഷ്ടപ്പെടുത്താന്‍ മറ്റ് ഡിവിഷനുകളില്‍ നിന്ന് കുറവന്താവളം ഡിവിഷനിലേക്ക് തൊഴിലാളികളെ എത്തിച്ച് ജോലി ചെയ്യിക്കുന്നുമുണ്ട്. സമരം ശക്തമായ സാഹചര്യത്തില്‍ നാളെ റീജിയണല്‍ ജോയിന്റ് ലേബര്‍ കമ്മിഷണറുടെ ചേംബറില്‍ ചര്‍ച്ച നടക്കും.