വെല്ലിങ്ടന്‍: ആറു വിക്കറ്റുകള്‍ വീഴ്ത്തി കരിയറിലെ ഏറ്റവും മികച്ച പ്രകടനവുമായി സ്പിന്നര്‍ കേശവ് മഹാരാജ് തിളങ്ങിയപ്പോള്‍ ന്യൂസിലന്‍ഡിനെതിരായ രണ്ടാം ക്രിക്കറ്റ് ടെസ്റ്റില്‍ ദക്ഷിണാഫ്രിക്കയ്ക്ക് എട്ടു വിക്കറ്റ് വിജയം. ന്യൂസിലന്‍ഡ് ഒന്നാം ഇന്നിങ്‌സില്‍ 268 റണ്‍സെടുത്തപ്പോള്‍ ദക്ഷിണാഫ്രിക്ക 359 എടുത്ത് 91 റണ്‍സിന്റെ ലീഡ് സ്വന്തമാക്കി. രണ്ടാം ഇന്നിങ്‌സില്‍ കിവികളുടെ പോരാട്ടം 171റണ്‍സില്‍ അവസാനിപ്പിച്ച ദക്ഷിണാഫ്രിക്ക വിജയ ലക്ഷ്യമായ 80 റണ്‍സ് രണ്ടു വിക്കറ്റ് നഷ്ടത്തില്‍ 83 റണ്‍സെടുത്തു മറികടന്നു.
ആദ്യ ഇന്നിങ്‌സില്‍ കിവികളുടെ രണ്ടു വിക്കറ്റ് വീഴ്ത്തിയ മഹാരാജ് രണ്ടാം ഇന്നിങ്‌സില്‍ 40 റണ്‍സ് വഴങ്ങി ആറു വിക്കറ്റുകള്‍ വീഴ്ത്തി. മഹരാജാണു കളിയിലെ കേമന്‍. മൂന്നു മത്സരങ്ങളടങ്ങിയ ടെസ്റ്റ് പരമ്പരയില്‍ ദക്ഷിണാഫ്രിക്ക 1-0ത്തിനു മുന്നില്‍. ആദ്യ ടെസ്റ്റ് സമനിലയില്‍ അവസാനിച്ചിരുന്നു. പരമ്പര നഷ്ടപ്പെടില്ലെന്നുറപ്പിക്കാന്‍ ജയത്തോടെ ദക്ഷിണാഫ്രിക്കയ്ക്ക് സാധിച്ചു.