കൊച്ചി: 16ാമത് ചാംപ്യന്‍സ് ട്രോഫി ബാസ്‌ക്കറ്റ്‌ബോള്‍ പുരുഷ വിഭാഗം കിരീടം കൊച്ചി കസ്റ്റംസ് ആന്റ് സെന്‍ട്രല്‍ എക്‌സൈസ് ടീമിന്. ഫൈനല്‍ ലീഗ് മത്സരത്തില്‍ കെ.എസ്.ഇ.ബിയെ കീഴടക്കിയാണു കസ്റ്റംസിന്റെ മുന്നേറ്റം. സ്‌കോര്‍: 7-2, 6-8.
കിരീട നേട്ടത്തോടെ ഈ മാസം 22 മുതല്‍ കോയമ്പത്തൂരില്‍ നടക്കുന്ന ഫെഡറേഷന്‍ കപ്പില്‍ കേരളത്തെ പ്രതിനിധീകരിക്കാനുള്ള യോഗ്യതയും ക്ലബ് നേടി.
വനിത വിഭാഗത്തില്‍ കേരള പൊലിസ് ജേതാക്കളായി. ചാംപ്യന്‍ഷിപ്പിലെ പ്രകടനത്തിന്റെ അടിസ്ഥാനത്തില്‍ ഫെഡറേഷന്‍ കപ്പിനുള്ള കേരള വനിതാ ടീമിനെ പ്രഖ്യാപിച്ചു.
നീനുമോള്‍ പി.എസ്, സൂര്യ പി.ആര്‍, ചിപ്പി മാത്യു, വിനയ ജോസഫ് (കേരള പൊലിസ്), അഞ്ജന പി.ജി, റോജാമോള്‍, ഷില്‍ജി ജോര്‍ജ്ജ് (കെ.എസ്.ഇ.ബി), ഇന്ത്യ നെല്‍സണ്‍, കവിത ജോസ് (അസംപ്ഷന്‍ കോളജ്), ശില്‍പ അതുല്യ എന്‍ (പ്രൊവിഡന്‍സ് കോളജ് കോഴിക്കോട്), നിമ്മി ജോര്‍ജ്ജ് (സെന്റ് ജോര്‍ജ്ജ് കോളജ് ഇരിങ്ങാലക്കുട) എന്നിവരാണ് ടീമംഗങ്ങള്‍. ദേശീയ സീനിയര്‍ ടീം ക്യാംപിലുള്ള അഞ്ജന പി.ജി, റോജാമോള്‍, നിമ്മി ജോര്‍ജ്ജ് എന്നിവരെ നേരിട്ടാണ് തിരഞ്ഞടുത്തത്.