മഡ്ഗാവ്: സന്തോഷ് ട്രോഫി പോരാട്ടത്തില്‍ നിലവിലെ ചാംപ്യന്മാരായ സര്‍വിസസിനു വീണ്ടും തോല്‍വി. മൂന്നാം മത്സരത്തില്‍ അവരെ മേഘാലയ 2-0ത്തിനു വീഴ്ത്തി. മറ്റൊരു മത്സരത്തില്‍ ആതിഥേയരായ ഗോവയെ ചണ്ഡീഗഢ് 1-1നു സമനിലയില്‍ തളച്ചു.
മൂന്നു മത്സരങ്ങളില്‍ സര്‍വിസസ് രണ്ടാം തോല്‍വിയിലേക്കു വീണതോടെ അവരുടെ മുന്നോട്ടുള്ള പ്രയാണം പരുങ്ങലിലായി. പ്രതിരോധ പിഴവാണു നിലവിലെ ചാംപ്യന്‍മാര്‍ക്കു വിനയായി മാറിയത്. മേഘാലയ ടൂര്‍ണമെന്റില്‍ സ്വന്തമാക്കുന്ന ആദ്യ വിജയം കൂടിയാണിത്. ഇരു പകുതികളിലായി നേടിയ ഗോളുകളാണു മേഘലയ്ക്ക് വിജയം സമ്മാനിച്ചത്. കളിയുടെ എട്ടാം മിനുട്ടില്‍ ദിബിന്റോയ് നോന്‍സ്പങും 76ാം മിനുട്ടില്‍ ബിഷ്‌റാലാങ് ഖറുമുനൈദും മേഘാലയക്കായി സ്‌കോര്‍ ചെയ്തു.
13ാം മിനുട്ടില്‍ ആരന്‍ ഡിസില്‍വയിലൂടെ ഗോവ ലീഡെടുത്തെങ്കിലും രണ്ടാം പകുതിയുടെ 51ാം മിനുട്ടില്‍ സെഹ്ജ്പാല്‍ സിങ് ചണ്ഡീഗഢിനു സമനില സമ്മാനിക്കുകയായിരുന്നു. മൂന്നു കളികളില്‍ ചണ്ഡീഗഢിന്റെ രണ്ടാം വിജയമാണിത്. ഗോവ രണ്ടാം മത്സരത്തിലാണു സമനില വഴങ്ങുന്നത്.