മ്യൂണിക്ക്: ജര്‍മന്‍ ബുണ്ടസ് ലീഗയില്‍ ബൊറൂസിയ ഡോര്‍ട്മുണ്ടിനു സ്വന്തം തട്ടകത്തില്‍ വിജയം. ഇംഗോള്‍സ്റ്റഡിനെ മറുപടിയില്ലാത്ത ഒറ്റ ഗോളിനു വീഴ്ത്തിയാണു ബൊറൂസിയ വിജയം സ്വന്തമാക്കിയത്. അതേസമയം രണ്ടാം സ്ഥാനത്തുള്ള ലെയ്പ്‌സിഗിനു വീണ്ടും തോല്‍വി പിണഞ്ഞു. മറുപടിയില്ലാത്ത മൂന്നു ഗോളുകള്‍ക്ക് അവരെ വെര്‍ഡര്‍ ബ്രെമന്‍ വീഴ്ത്തി.
മികച്ച ഫോമില്‍ നില്‍ക്കുന്ന ഔബമേയങ് 14ാം മിനുട്ടില്‍ നേടിയ ഒറ്റ ഗോളാണു മുന്‍ ചാംപ്യന്‍മാരായ ബൊറൂസിയക്ക് വിജയമൊരുക്കിയത്. സീസണിലെ 23ാം ബുണ്ടസ് ലീഗ ഗോള്‍ നേടിയ ഔബമേയങ് ഗോള്‍ വേട്ടയില്‍ ഒന്നാം സ്ഥാനത്തുമെത്തി.
തോറ്റെങ്കിലും ലെയ്പ്‌സിഗിന്റെ രണ്ടാം സ്ഥാനത്തിനു ഇപ്പോള്‍ ഭീഷണിയില്ല. മൂന്നു പോയിന്റ് വ്യത്യാസത്തില്‍ ബൊറൂസിയ മൂന്നാം സ്ഥാനത്തു തുടരുന്നു. മറ്റു മത്സരങ്ങളില്‍ വോള്‍വ്‌സ്ബര്‍ഗ് 1-0ത്തിനു ഡാംസ്റ്റഡിനേയും കൊളോണ്‍ 4-2നു ഹെര്‍ത്തയേയും ഹോഫെന്‍ഹെയിം 1-0ത്തിനു ബയര്‍ ലെവര്‍കൂസനേയും പരാജയപ്പെടുത്തി. ഓഗ്‌സ്ബര്‍ഗ്- ഫ്രീബര്‍ഗ് മത്സരം 1-1നു സമനില.