കൊണ്ടോട്ടി:കരിപ്പൂര്‍ വിമാനത്താവളത്തില്‍ നിന്ന് ഇടത്തരം വിമാനങ്ങളുടെ സര്‍വിസ് പുനരാരംഭിക്കുന്നതിനായി സഊദി എയര്‍ലെന്‍സ് സമര്‍പ്പിച്ച റിപ്പോര്‍ട്ടില്‍ എയര്‍പോര്‍ട്ട് അതോറിറ്റി കേന്ദ്ര കാര്യാലയം വീണ്ടും വിശദീകരണം തേടി.സഉദി എയര്‍ലൈന്‍സ് കഴിഞ്ഞ മാസം സമര്‍പ്പിച്ച സുരക്ഷാ റിപ്പോര്‍ട്ടിലാണ് അതോറിറ്റി വിശദീകരണം ആവശ്യപ്പെട്ടത്.വിമാന ഇന്ധന ടാങ്കിന്റെ ശേഷി അനുസരിച്ച് മുഴുവന്‍ ഇന്ധനം നിറച്ച് നിറയെ യാത്രക്കാരും കാര്‍ഗോയും അടക്കം സര്‍വിസ് നടത്തുന്നതിനാവശ്യമായ ക്ഷമത കരിപ്പൂരിലെ റണ്‍വേക്കുണ്ടോയെന്ന് പരിശോധിക്കണമെന്നാണ് അതോറിറ്റി പുതിയ ന്യായം ഉന്നയിച്ചിരിക്കുന്നത്.
എന്നാല്‍ വിമാനം പറക്കുന്ന ദൂരത്തില്‍ നിന്ന് ഒരുമണിക്കൂര്‍ വരെ പറക്കാന്‍ ആവശ്യമായ ഇന്ധനം നിറച്ച് സര്‍വിസ് നടത്തിയാല്‍ മതിയെന്ന് സഊദി എയര്‍ലെന്‍സ് ഉന്നത ഉദ്യോഗസ്ഥര്‍ പറയുന്നു. ജിദ്ദയില്‍ നിന്ന് കരിപ്പൂരിലേക്ക് അഞ്ച് മണിക്കൂറിനുളളില്‍ വിമാനത്തിന് പറന്നെത്താന്‍ സാധിക്കും.ഈ ദൂരത്തേക്കാള്‍ ഒരു മണിക്കൂര്‍ അധികം സഞ്ചരിക്കുന്നതിനുളള ഇന്ധനമാണ് വിമാനത്തിലുണ്ടാകേണ്ടത്.നിശ്ചിത സമയത്ത് വിമാനത്തിന് ലാന്റിങ് തടസപ്പെട്ടാല്‍ സമീപത്തുളള മറ്റു വിമാനത്താവളങ്ങളില്‍ പറന്നിറങ്ങാനുളള ഇന്ധനമാണ് ടാങ്കില്‍ നിക്ഷേപിക്കേണ്ടത്.
എന്നാല്‍ എയര്‍പോര്‍ട്ട് അതോറിറ്റി ഡല്‍ഹി കേന്ദ്ര കാര്യാലയം 15 മണിക്കൂറിലധികം നേരിട്ട് സഞ്ചരിക്കാന്‍ സാധിക്കുന്ന വിമാനത്തില്‍ മുഴുവന്‍ ഇന്ധനം നിറച്ച് പറന്നിറങ്ങി പരീക്ഷണം നടത്തണമെന്ന ന്യായമാണ് മുന്നോട്ട് വച്ചിരിക്കുന്നത്.