തിരുവനന്തപുരം: റേഷന്‍ധാന്യങ്ങള്‍ എത്തുന്ന എഫ്.സി.ഐ ഗോഡൗണുകളില്‍ സി.സി.ടി.വി സ്ഥാപിക്കുമെന്ന് ഭക്ഷ്യമന്ത്രി പി. തിലോത്തമന്‍. കുറ്റമറ്റ രീതിയില്‍ റേഷന്‍ ധാന്യങ്ങള്‍ നല്‍കുകയാണ് ലക്ഷ്യം.
റേഷന്‍ കട ഉടമകള്‍ ഗോഡൗണില്‍ പോയി അരിയുടെ തൂക്കം ഉറപ്പു വരുത്തണം. ജി.പി.എസ് ഘടിപ്പിച്ച വാഹനങ്ങളില്‍ റേഷന്‍ സാധനങ്ങള്‍ കടകളിലെത്തിക്കും. ആദിവാസികള്‍ക്ക് കിലോമീറ്ററുകള്‍ യാത്ര ചെയ്ത് റേഷന്‍ വാങ്ങാന്‍ വരുന്നതില്‍ പരിഹാരമുണ്ടാക്കാന്‍ ആദിവാസികള്‍ കൂടുതലുള്ള പാലക്കാട്, വയനാട്, ഇടുക്കി എന്നീ ജില്ലകളിലെ ജില്ലാ കലക്ടര്‍മാരോട് ഊരുകളിലെ പ്രതിനിധികളുമായി ചര്‍ച്ച ചെയ്ത് ഒരു സ്ഥലം തീരുമാനിച്ചാല്‍ വനംവകുപ്പിന്റെ വാഹനത്തില്‍ അവിടെ എത്തിക്കാന്‍ തീരുമാനിച്ചിട്ടുണ്ടെന്നും മന്ത്രി പറഞ്ഞു.
സംസ്ഥാനത്തെ 1,374 റേഷന്‍ കടകളിലും ഇ-പോസ് മെഷിന്‍വച്ച് റേഷന്‍ വിതരണം ആരംഭിച്ചുവെന്നും മന്ത്രി പറഞ്ഞു. റേഷന്‍ മുന്‍ഗണനാ പട്ടികയില്‍നിന്നു 1,68,567 പേരെ നീക്കം ചെയ്ത് അര്‍ഹരെ ഉള്‍പ്പെടുത്തി. കുറ്റമറ്റ വിതരണ സമ്പ്രദായം ഉറപ്പാക്കാന്‍ ഈ വര്‍ഷം തന്നെ സോഷ്യല്‍ ഓഡിറ്റിങ് ഏര്‍പ്പെടുത്താന്‍ ടാറ്റാ ഇന്‍സ്റ്റിറ്റ്യൂട്ട് ഓഫ് സോഷ്യല്‍ സയന്‍സുമായി ധാരണാപത്രം ഒപ്പിട്ട് പ്രവര്‍ത്തനം ആരംഭിച്ചുവെന്നും എല്ലാ റേഷന്‍ വ്യാപാരികള്‍ക്കും തിരിച്ചറിയല്‍ കാര്‍ഡ് നല്‍കുമെന്നും മന്ത്രി പറഞ്ഞു.
അതേസമയം, ഒരു കാര്‍ഡിലും ഉള്‍പ്പെടാത്ത 75,000 ഓളം കുടുംബങ്ങള്‍ക്ക് ജൂണ്‍ ഒന്നു മുതല്‍ കാര്‍ഡ് നല്‍കുമെന്നും പുതിയ കാര്‍ഡിനുള്ള അപേക്ഷ ജൂണ്‍ ഒന്നു മുതല്‍ സ്വീകരിക്കുമെന്നും മന്ത്രി പറഞ്ഞു. നവീകരിച്ച റേഷന്‍ കടയുടെ ഉദ്ഘാടനവും, വാതില്‍പ്പടി വിതരണം, കംപ്യൂട്ടര്‍വല്‍ക്കരണം, ഇ-പോസ് മെഷീനുകള്‍ സ്ഥാപിക്കല്‍, പോര്‍ട്ടബിലിറ്റി സൗകര്യം തുടങ്ങി ദേശീയ ഭക്ഷ്യഭദ്രതാ നിയമം ആവശ്യപ്പെട്ടിരിക്കുന്നതുപോലെ കേരളം പൂര്‍ത്തിയാക്കിയതിന്റെ പ്രഖ്യാപനവും നാളെ കണ്ണൂരില്‍ മുഖ്യമന്ത്രി പിണറായി വിജയന്‍ നിര്‍വഹിക്കും.