കോഴിക്കോട്: 'ഞമ്മക്ക് പോയാലും ഇങ്ങളെ പെരുന്നാള് ജോറായിക്കോട്ടെ താത്തെ...' ഏതു കടയില്‍ കയറണമെന്ന് ശങ്കിച്ച് നില്‍ക്കുന്ന ഉമ്മയോടും മക്കളോടും വിലക്കുറവിന്റെ കാര്യം സൂചിപ്പിച്ചുകൊണ്ടുള്ള തുണിക്കടയിലെ ജീവനക്കാരന്റെ വാക്കുകളാണിത്. പുണ്യദിനങ്ങളുടെ ഒടുവിലെത്തുന്ന പെരുന്നാളൊരുക്കത്തിനായി ലഭിച്ച ഞായറാഴ്ചയില്‍ ആയിരങ്ങളാണ് മഴയെ അവഗണിച്ചും ഇന്നലെ നഗരത്തിലെത്തിച്ചേര്‍ന്നത്. വസ്ത്രങ്ങളെടുക്കാനും മധുര പലഹാരങ്ങള്‍ക്കും പെരുന്നാള്‍ ഭക്ഷണമൊരുക്കാനുള്ള വിഭവങ്ങള്‍ വാങ്ങാനുമായാണ് ഭൂരിഭാഗം പേരും കടകള്‍ തോറും കയറിയിറങ്ങിയത്. ഒഴിവു ദിവസമായതിനാല്‍ കുടുംബസമേതം എത്തിയവരുടെ എണ്ണവും കുറവല്ല. മിഠായിത്തെരുവിലാണ് പ്രധാനമായും കാലുകുത്താനിടമില്ലാത്ത വിധം തിരക്കനുഭവപ്പെട്ടത്. പാളയത്തും നഗരത്തിലെ വലിയ വസ്ത്ര വില്‍പന ശാലകളിലും മാളുകളിലും സൂപ്പര്‍ മാര്‍ക്കറ്റുകളിലും തിരക്കിന് കുറവുണ്ടായിരുന്നില്ല.
മിഠായിത്തെരുവില്‍ റോഡിലൂടെ ഒഴുകിയ ജനസഞ്ചയത്തെ തങ്ങളുടെ കടയിലേക്കാകര്‍ഷിക്കാന്‍ രസകരമായ വാക് പ്രയോഗങ്ങളുമായി എല്ലാ കടകള്‍ക്ക് മുന്‍പിലും ജീവനക്കാരുടെ നിരയുണ്ടായിരുന്നു. വിലക്കുറവിന്റെ കാര്യം പറഞ്ഞും വസ്ത്ര വൈവിധ്യങ്ങളുടെ ശേഖരം ഉയര്‍ത്തിക്കാട്ടിയും ഇവര്‍ പരസ്പരം മത്സരിച്ചു. പെരുന്നാളിനോടനുബന്ധിച്ചുള്ള കച്ചവടം മുന്നില്‍കണ്ട് വ്യാപാരികളും വലിയ ഒരുക്കങ്ങള്‍ നടത്തിയിരുന്നു. പ്രധാനമായും വസ്ത്ര വ്യാപാരികളാണ് വിപണി കീഴടക്കാന്‍ കൂടുതല്‍ മുതല്‍ മുടക്കിയത്. വര്‍ണാഭമായ പരസ്യങ്ങള്‍ നല്‍കിയും പെരുന്നാള്‍ സ്‌പെഷല്‍ കലക്ഷനുകള്‍ ഒരുക്കിയും വന്‍കിട വസ്ത്ര വ്യാപാരികള്‍ കച്ചവടം ലക്ഷ്യമിട്ടപ്പോള്‍ ഏവര്‍ക്കും താങ്ങാവുന്ന വിലനിരക്കുമായാണ് ചെറുകിട കച്ചവടക്കാര്‍ രംഗത്തെത്തിയത്.
റമദാന്‍ വ്രതാരംഭത്തോടെ തന്നെ പഴം പച്ചക്കറി വിപണി സജീവമാണെങ്കിലും പെരുന്നാളിന് ദിവസങ്ങള്‍ മാത്രം ശേഷിക്കേ ഇവിടെയും കൂടുതല്‍ തിരക്കനുഭവപ്പെടുന്നുണ്ട്. വില വര്‍ധനവില്‍ കാര്യമായ മാറ്റമില്ലെങ്കിലും വില്‍പനയില്‍ കുറവുണ്ടായിട്ടില്ല. ഉച്ചയ്ക്കു ശേഷമാണ് നഗരം ശരിക്കും ജനത്തിരക്കില്‍ വീര്‍പ്പുമുട്ടിയത്. കാറുകളിലും ഇരുചക്രവാഹനങ്ങളിലുമായി കൂടുതല്‍ പേരെത്തിയതും പ്രധാന ജങ്ഷനുകളിലെ സിഗ്നല്‍ ലൈറ്റ് പ്രവര്‍ത്തന രഹിതമായതും ഗതാഗത തടസവുമുണ്ടാക്കി. മതസൗഹാര്‍ദവും വ്രതശുദ്ധിയുടെ മഹത്വവും വിളിച്ചോതാന്‍ ഇഫ്താര്‍ സംഗമങ്ങളുമായി രാഷ്ട്രീയ-സാമൂഹ്യ-സാംസ്‌കാരിക സംഘടനകളും സജീവമായി രംഗത്തുണ്ട്.