ഒലവക്കോട്: ജില്ലയില്‍ ആരോഗ്യവകുപ്പു നടത്തുന്ന റെയ്ഡുകള്‍ പ്രഹസനമെന്ന് ആരോപണങ്ങളുയരുന്നു. വിവിധ താലൂക്കുകളില്‍ കഴിഞ്ഞ ഒരാഴ്ചയായി നടത്തിയ റെയ്ഡുകളാണ് പ്രഹസനമായതെന്നാണ് ആക്ഷേപം.
നിരവധി ഹോട്ടലുകളിലും ബേക്കറികളിലും പരിശോധന നടത്തിയെങ്കിലും ഉടമകളില്‍ നിന്നും നിസാര പിഴ മാത്രം ഈടാക്കുകയായിരുന്നുവെന്നാണ് റിപ്പോര്‍ട്ട്.
നഗരത്തിലെ 60 ശതമാനം ഹോട്ടലുകളിലും 70 ശതമാനം ബേക്കറികളിലും ഈച്ചശല്യം രൂക്ഷമായിട്ടും ആരോഗ്യ വകുപ്പ് നടപടിയെടുക്കുന്നില്ലെന്നും പരാതിയുണ്ട്. കഴിഞ്ഞ ദിവസങ്ങളില്‍ പാലക്കാട് നഗരസഭയിലെ ആരോഗ്യ വിഭാഗം ജീവനക്കാരും വിവിധ കേന്ദ്രങ്ങളിലെത്തി പരിശോധനകള്‍ നടത്തിയിരുന്നുവെങ്കിലും. നഗരസഭക്ക് കുറഞ്ഞ പിഴ വാങ്ങി നല്‍കുകയും കൂടിയ തുക ഉദ്യോഗസ്ഥര്‍ കീശയിലാക്കുന്നുവെന്നുമാണ് പരാതികളുയരുന്നത്.
എന്നാല്‍, നഗരത്തിലെ ഹോട്ടലുകള്‍ക്ക് പദവി തീരുമാനിക്കണമെന്നും ഭക്ഷണ വില ഏകീകരിക്കണമെന്നും പല തവണ ജില്ലാ കലക്ടര്‍ ആവശ്യപ്പെട്ടുവെങ്കിലും നടത്തിയ മിക്ക ചര്‍ച്ചകളും അലസി പിരിയുകയായിരുന്നു. ആരോഗ്യ വകുപ്പിന്റെ ഇത്തരത്തിലുള്ള അനാസ്ഥക്കെതിരെ പലഭാഗത്തു നിന്നും പ്രതിഷേധം ഉയരുന്നുണ്ട്