ചെങ്ങന്നൂര്‍: തിരക്കേറിയ ബഥേല്‍ ജങ്ഷനില്‍ ചുവന്ന ഷര്‍ട്ടും വെള്ളമുണ്ടുമുടുത്ത് ''മോഹന്‍ലാല്‍'' വന്നിറങ്ങുന്നു. സെല്‍ഫിയെടുക്കാന്‍ ഓടിയെത്തുന്ന പെണ്‍കുട്ടി.. സെല്‍ഫിയെടുക്കാം പക്ഷേ വോട്ട് വേണം... കൈപ്പത്തിയ്ക്ക്, വിജയകുമാറിന്... ചലച്ചിത്ര , രാഷ്ട്രീയ മേഖലകളിലെ അപരന്മാരെ അവതരിപ്പിക്കുന്ന , ടി.വി കോമഡി ഷോകളിലെ കലാകാരന്മാരാണ് യു.ഡി.എഫിന്റെ കലാജാഥയുമായി മണ്ഡലത്തില്‍ അരങ്ങ് തകര്‍ക്കുന്നത്.
വിജയകുമാറിന്റെ ഗുണഗണങ്ങള്‍ ഒന്നാം രംഗത്തില്‍ സിനിമാ ഡയലോഗ് പോലെ കാച്ചിയാണ് മോഹന്‍ലാലിന്റ അപരന്‍ രംഗം വിടുന്നത്. തുടര്‍ന്ന് പ്രവേശിക്കുന്ന ഓട്ടന്‍തുള്ളല്‍ കലാകാരന്‍ ആനുകാലിക രാഷ്ടീയം നര്‍മ്മത്തോടെ അവതരിപ്പിക്കുന്നു.
എല്ലാം ശരിയാക്കുന്ന സര്‍ക്കാരില്‍ തുടങ്ങി ഷുഹൈബ് വധവും ശ്രീജിത്തിന്റെ കസ്റ്റഡി മരണവും വിശപ്പ് ശമിപ്പിക്കാനുള്ള നെട്ടോട്ടത്തിനിടയില്‍ കൊല്ലപ്പെടുന്ന മധുവുമെല്ലാം നൊമ്പരത്തോടെ വരച്ചിടുന്നു ഓട്ടന്‍തുളളല്‍ കലാകാരന്‍.
ഇതിന് പിന്നാലെ വിഎസിന്റേയും പിണറായി, രമേശ് ചെന്നിത്തല , ഉമ്മന്‍ ചാണ്ടി , കുമ്മനം രാജശേഖരന്‍ , നരേന്ദ്ര മോദി, കോടിയേരി ബാലകൃഷ്ണന്‍,സുരേഷ് ഗോപി തുടങ്ങിയവരുടെ അപരന്മാരും പ്രത്യക്ഷപ്പെടുന്നു. നിലവില്‍ വി.എസ് വഹിക്കുന്ന പദവിയെന്തെന്ന ചോദ്യത്തിന് മുന്നില്‍ കൈ മലര്‍ത്തുന്ന വി.എസ് ഒരു രാഷ്ട്രീയ ചിരിയായി മാറുന്നു.
ഹിന്ദി പഠിക്കാന്‍ പാടുപെടുന്ന കുമ്മനവും കണ്ണട വാങ്ങിയ വിവാദത്തില്‍പ്പെട്ട ശൈലജ ടീച്ചറും ആക്ഷേപ ഹാസ്യത്തില്‍ ചൂളിപ്പോകുന്നു.
മക്കള്‍ എന്തു തൊഴില്‍ ചെയ്യുന്നുവെന്ന് അറിയാത്ത പിതാവായി കോടിയേരി ബാലകൃഷ്ണന്‍ എത്തുമ്പോള്‍ അത് ഇടതു പക്ഷത്തിനുള്ള കനത്ത പ്രഹരവുമാകുന്നു.
അവസാന രംഗത്ത് ഉമ്മന്‍ ചാണ്ടിയുടെ അപരനും രമേശ് ചെന്നിത്തലയുടെ അപരനും രംഗത്തെത്തി കഴിഞ്ഞ യുഡി എഫ് സര്‍ക്കാരിന്റെ കാലത്തെ ഭരണ നേട്ടങ്ങള്‍ പറയുകയും ഡി.വിജയകുമാറിന് വേണ്ടി വോട്ട് അഭ്യര്‍ത്ഥിക്കുകയും ചെയ്യുന്നതോടെയാണ് ഇപ്പം ശരിയാക്കാം എന്ന കലാജാഥ അവസാനിക്കുന്നത്.
ഏഷ്യാനെറ്റ് കോമഡി സ്റ്റാര്‍സ് , ഫ്‌ലവേഴ്‌സ് ടി.വി കോമഡി ഉത്സവം എന്നീ പരിപാടികളിലൂടെ ശ്രദ്ധേയരായ അനിഷ്, റെജി സാഗര്‍ , വിനേഷ് , ഷിഹാദ് ,വിനു ശങ്കര്‍ , ശശി വാളൂരാന്‍ , തഴവ അനസ് , നരിയാപുരം ലീല , ദേവിക എന്നിവരാണ് കലാജാഥയിലുള്ളത്.
സിനിമാ- ടീ വി താരം പ്രസാദ് കരുനാഗപ്പള്ളി, ഷിഹാദ് കരുനാഗപ്പളളി എന്നിവരാണ് സംഘത്തെ നയിക്കുന്നത്.