വിഴിഞ്ഞം: യുവാവിനെ മര്‍ദിച്ച് ഗുരുതരമായി പരുക്കേല്‍പ്പിച്ച സംഘത്തെ പൊലിസ് സംരക്ഷിക്കുന്നതായി പരാതി. ഉച്ചക്കട പയറ്റുവിള പനംപഴിഞ്ഞി സ്വദേശിയായ സെന്തില്‍ (26)എന്ന യുവാവിന് നേര്‍ക്കാണ് ഒരാഴ്ച മുന്‍പ് ആക്രമണം നടന്നത്. ആക്രമണത്തില്‍ യുവാവിന്റെ കേള്‍വി ശക്തി നഷ്ടപ്പെട്ടിരുന്നു. ഓപ്പറേഷന്‍ നടത്തിയാലും കേള്‍വി തിരിച്ചു കിട്ടുമെന്ന് ഉറപ്പില്ല എന്നാണ് ഡോക്ടര്‍മാര്‍ അറിയിച്ചതെന്ന് യുവാവിന്റെ ബന്ധുക്കള്‍ പറയുന്നു.
സംഭവം നടന്ന ദിവസം തന്നെ വിഴിഞ്ഞം പൊലിസ് സ്റ്റേഷനില്‍ പരാതി നല്‍കിയിട്ടും പ്രതികള പിടികൂടാന്‍ പൊലിസിന് സാധിച്ചിട്ടില്ല. ഉന്നത ഉദ്ദ്യോഗസ്ഥരെ കണ്ട് പരാതി ബോധിപ്പിച്ചെങ്കിലും നടപടികള്‍ ആരംഭിക്കാത്ത സാഹചര്യത്തില്‍ മനുഷ്യാവകാശ കമ്മിഷന്‍ ഉള്‍പ്പെടെയുള്ളവരെ സമീപിക്കാന്‍ ഒരുങ്ങുകയാണ് യുവാവിന്റെ ബന്ധുക്കള്‍.