മട്ടന്നൂര്‍: രഹസ്യ വിവരത്തെ തുടര്‍ന്നു മട്ടന്നൂര്‍ പൊലിസ് ചാവശേരി പറമ്പ് പ്രദേശത്തു നടത്തിയ പരിശോധനയില്‍ ഒരു ഐസ്‌ക്രീം ബോംബും ഒരു സ്റ്റീല്‍ ബോംബിന്റെ ഒഴിഞ്ഞ കണ്ടെയ്‌നറും കണ്ടെടുത്തു.
ഇന്നലെ ഉച്ചയോടെ മട്ടന്നൂര്‍ എസ്.ഐ ശിവന്‍ ചോടോത്തിന്റെ നേതൃത്വത്തില്‍ കണ്ണൂരില്‍ നിന്നെത്തിയ ബോംബ് സ്‌ക്വാഡിന്റെയും ഡോഗ് സ്‌ക്വാഡിന്റെയും സഹായത്തോടെ നടത്തിയ പരിശോധനയിലാണ് ബോംബും സ്റ്റീല്‍ ബോംബിന്റെ കണ്ടെയ്‌നറും കണ്ടെത്തിയത്. ചാവശേരി മുഖപ്പറമ്പിലെ കാടുപിടിച്ചു കിടക്കുന്ന സ്ഥലത്തെ മരച്ചുവട്ടില്‍ ചപ്പുചവറുകള്‍ കൊണ്ട് ഒളിപ്പിച്ചു വച്ച നിലയിലായിരുന്നു ബോംബ്. കുളത്തൂര്‍ പറമ്പിനു പുറമെ ചാവശേരി പറമ്പ്, മുഖപറമ്പ്, ക്രഷറിനു സമീപം തുടങ്ങിയ സ്ഥലങ്ങളിലും പരിശോധന നടത്തി. പിടികൂടിയ ബോംബ് പിന്നീട് ബോംബ് സ്‌ക്വാഡ് നിര്‍വീര്യമാക്കി.
കഴിഞ്ഞ ദിവസം ഉളിയില്‍ ചാളപറമ്പില്‍ നിന്നു 11 ഐസ്‌ക്രീ ബോംബുകളും 14 ഐസ്‌ക്രീം കണ്ടെയ്‌നറുകളും പിടികൂടിയിരുന്നു. എസ്.ഐ ശിവന്‍ ചോടോത്തിനു പുറമെ അഡിഷണല്‍ എസ്.ഐ കെ. സുധാകരന്‍, ബോംബ് സ്‌ക്വാഡ് എസ്.ഐ ടി.വി ശശിധരന്‍, എ.എസ്.ഐ എം.സി ജിയാസ്, രാജീവന്‍, സജീഷ് തുടങ്ങിയവര്‍ പരിശോധനയില്‍ പങ്കെടുത്തു.