പൊന്നാനി: നഗരസഭയില്‍ ആധാര്‍ എടുക്കാനുള്ള സൗകര്യമില്ലാത്തത് പൊതുജനങ്ങളെ ദുരിതത്തിലാക്കുന്നു. റേഷന്‍ കാര്‍ഡില്‍ പേര് ചേര്‍ക്കുന്നതിനും മറ്റു എല്ലാ സര്‍ക്കാര്‍ ആവശ്യങ്ങള്‍ക്കും ആധാര്‍ നിര്‍ബന്ധമായിരികെ  നഗരസഭാ പ്രദേശത്ത് ആധാര്‍ എടുക്കാനുള്ള സംവിധാനമില്ലാത്തതാണ് പൊതുജനങ്ങളെ  ദുരിതത്തിലാക്കിയത്.
നഗരസഭാ പരിധിയില്‍ സൗകര്യമില്ലാത്തതിനാല്‍  മാറഞ്ചേരിയിലും വട്ടക്കുളത്തുമെല്ലാം പോയി സ്ത്രീകളും കുട്ടികളും ഉള്‍പെട്ടെയുള്ളവര്‍  ദിവസങ്ങളോളമായി ദുരിതം പേറുകയാണ്. ജനങ്ങളുടെ ദുരിതം മനസിലാക്കി അടിയന്തര പ്രാധാന്യത്തോടെ  പൊന്നാനി നഗരസഭാ കാര്യാലയത്തില്‍ തന്നെ ആധാര്‍ എടുക്കാനുള്ള സംവിധാനം ഒരുക്കണമെന്നും കിടപിലായവര്‍ക്കും ശാരീരിക വെല്ലുവിളി നേരിടുന്നവര്‍ക്കും വീട്ടില്‍ ചെന്ന് ആധാര്‍ എടുക്കാനുള്ള  സംവിധാനം ഒരു കണമെന്നും പ്രതിപക്ഷ കക്ഷി നേതാവ് എം.പി നിസാര്‍ ആവശ്യപ്പെട്ടു.
വിഷയത്തിന്  പരിഹാരമായി ബി.പി.എല്‍  ലിസ്റ്റില്‍ അര്‍ഹരായവരെ പരിഗണിക്കുമെന്നും ആധാറിന് സാവകാശം  നല്‍കുമെന്നും സപ്ലൈ ഓഫിസര്‍ ഉറപ്പ് നല്‍കിയിട്ടുണ്ട് . റേഷന്‍  കാര്‍ഡ് വിതരണത്തില്‍ പൊതുജനങ്ങള്‍ക്കിടയില്‍ കടുത്ത ആശങ്ക നിലനില്‍ക്കുന്ന സാഹചര്യത്തിലാണ്  സപ്ലൈ ഓഫിസിര്‍ സമയപരിധി നീട്ടി നല്‍കിയത്. നിലവിലെ സാഹചര്യത്തില്‍ ആധാര്‍ കാര്‍ഡ് ഇല്ലാത്തവരെ  റേഷന്‍ കാര്‍ഡില്‍ ഉള്‍പെടുത്താന്‍ സാധിക്കില്ലെന്ന പ്രചാരണം ഭൂരിപക്ഷം കുടുംബങ്ങളിലും കടുത്തആശങ്ക  സൃഷ്ടിച്ചിരുന്നു. എല്ലാവര്‍ക്കും ആധാര്‍ കാര്‍ഡ് ലഭ്യമല്ലാത്ത സാഹചര്യത്തില്‍ കര്‍ശന നടപടിയില്‍ നിന്നും പിന്തിരിയണമെന്ന് യു.ഡി.എഫ് നേതാക്കള്‍ ആവശ്യപ്പെട്ടിരുന്നു .
ഇതേതുടര്‍ന്ന് ആധാര്‍ കാര്‍ഡ്  ഇല്ലാത്തവര്‍ക്കും ആനുകൂല്യം നല്‍കാമെന്നും ആധാര്‍ കാര്‍ഡ് കിട്ടുന്ന മുറക്ക് ഓഫിസില്‍ എത്തിച്ചാല്‍  മതിയെന്നും നേതാക്കള്‍ക്ക് സപ്ലൈ ഓഫിസര്‍ ഉറപ്പ് നല്‍കി.
ഇതിന് പുറമെ ബി.പി.എല്‍   ലിസ്റ്റില്‍  ഉള്‍പ്പെടാത്ത അര്‍ഹരായവര്‍ക്ക് ഇനിയും അപേക്ഷ നല്‍കാന്‍ ഇപ്പോള്‍ അവസരം നല്‍കുന്നുണ്ടെന്നും അര്‍ഹരായവര്‍  അടുത്ത ദിവസം തന്നെ അപേക്ഷ നല്‍കണമെന്നും സപ്ലൈ ഓഫിസര്‍ വ്യക്തമാക്കി.