പള്ളിക്കല്‍: റോഡിലൂടെ അമിത ഉയരത്തില്‍ ചരക്കുകള്‍ കയറ്റി പോകുന്ന ലോറികളും റോഡിനു കുറുകെ താഴ്ന്നു കിടക്കുന്ന വൈദ്യുതി ലൈനുകളുള്‍പ്പെടെയുള്ള കേബിള്‍ ലൈനുകളും അപകടത്തിന് കാരണമാകുന്നു.
ഇത്തരത്തില്‍ ഉയരത്തില്‍ കയറ്റിയ ചരക്കുമായി പോകുന്ന ലോറികള്‍ റോഡിന് കുറുകെയുള്ള കേബിളുകളില്‍ തട്ടി കാബിളുകള്‍ പൊട്ടിവീഴുന്നത് പതിവായിരിക്കുകയാണ്. കഴിഞ്ഞദിവസം കൊട്ടപ്പുറം ഭാഗത്ത് നിന്നു കാക്കഞ്ചേരി ഭാഗത്തേക്ക് ഉയരത്തില്‍ മുള കയറ്റി പോവുകയായിരുന്ന ലോറിക്ക്് മുകളില്‍ പൊട്ടിക്കുടുങ്ങിയ 25 മീറ്ററോളം നീളത്തിലുള്ള കേബിള്‍ റോഡിലൂടെ വലിച്ചിഴച്ച് വന്ന ലോറി നാട്ടുകാര്‍ പള്ളിക്കല്‍ അങ്ങാടിയില്‍ തടഞ്ഞ ശേഷമാണ് ലോറി ഡ്രൈവര്‍ വിവരമറിയിന്നത്.
ലോറിയുടെ എതിര്‍ ദിശയിലൂടെയെത്തി ലോറിക്ക് പിന്നിലൂടെ പരുത്തിക്കോട് റോഡിലേക്ക് തിരിഞ്ഞ ബൈക്ക് ലോറിക്ക് മകളില്‍ നിന്നും റോഡിലേക്ക് തൂങ്ങിക്കിടന്ന കേബിളില്‍ കുരുങ്ങാതെ തലനാരിഴക്കാണ് രക്ഷപ്പെട്ടത്. പൊട്ടിയ കാബിളിന് നഷ്ടപരിഹാരം നല്‍കാന്‍ തയാറാണെന്ന് പറഞ്ഞ ഡ്രൈവര്‍ പേരും മൊബൈല്‍ നമ്പറും നാട്ടുകാര്‍ക്ക് നല്‍കി. കഴിഞ്ഞ വ്യാഴാഴ്ച രാത്രി ഏഴോടെ പള്ളിക്കല്‍ കാവുംപടി ഭാഗത്ത് അജ്ഞാത വാഹനം റോഡിന് കുറുകെയുള്ള വൈദ്യതി ലൈന്‍ തകര്‍ത്ത് പോയതിനാല്‍ ഈ പ്രദേശത്ത് മുടങ്ങിയ വൈദ്യുതി വെള്ളിയാഴ്ച പത്തോടെയാണ് പുനസ്ഥാപിച്ചത്.
ഇത്തരത്തിലുള്ള അപകടം പതിവാകുന്നതിനാല്‍ വേണ്ട നടപടികള്‍ അധികൃതരുടെ ഭാഗത്ത് നിന്നുമുണ്ടാകണമെന്നാണ് നാട്ടുകാര്‍ ആവശ്യപ്പെടുന്നത്.