മലപ്പുറം: കോണ്‍ഫെഡറേഷന്‍ ഓഫ് കേരള കോളജ് ടീച്ചേഴ്‌സ് (സി.കെ.സി.ടി) സംസ്ഥാന സമ്മേളനം മലപ്പുറത്ത് സമാപിച്ചു. മൂന്നു ദിവസങ്ങളിലായി കോട്ടക്കുന്ന്് ഡി.ടി.പി.സി ഹാളില്‍ നടന്ന സമ്മേളനം ഇന്നലെ വൈകിട്ടു നടന്ന വിദ്യാഭ്യാസ സമ്മേളനത്തോടെയാണ് സമാപിച്ചത്.  വിദ്യാഭ്യാസത്തിന്റെ അപകോളനീകരണം എന്ന വിഷയത്തില്‍ നടന്ന സമ്മേളനം പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്തു. പ്രമുഖ പരിസ്ഥിതി പ്രവര്‍ത്തകന്‍ ക്ലോഡ് അല്‍വാരിസ്  മുഖ്യാതിഥിയായിരുന്നു. സി.കെ.സി.ടി മുന്‍ ജനറല്‍ ജനറല്‍ സെക്രട്ടറി പ്രൊഫ: കെ.കെ അഷ്‌റഫ് അധ്യക്ഷനായി. സംസ്ഥാന വൈസ് പ്രസിഡന്റ് ഡോ: അലവി ബിന്‍ മുഹമ്മദ്,  ഡോ: എസ്.എ ഫൈസി, ഡോ: എ.ഐ വിലായത്തുള്ള, കുറുക്കോളി മൊയ്തീന്‍, ഡോ: അലി നൗഫല്‍ എന്നിവര്‍ പ്രസംഗിച്ചു. ഈ വര്‍ഷം ജോലിയില്‍ നിന്നു വിരമിക്കുന്ന പ്രൊഫ: പാമ്പള്ളി മഹ്മൂദ്, പ്രൊഫ: ഷാജഹാന്‍, മജീദ് എന്നിവരെ സമ്മേളനത്തില്‍ ആദരിച്ചു. 17ന് സംസ്ഥാന പ്രസിഡന്റ് പ്രൊഫ. പാമ്പള്ളി മഹ്മൂദ് പതാക ഉയര്‍ത്തിയതോടെയാണ് മൂന്നുദിവസത്തെ സമ്മേളനം ആരംഭിച്ചത്. സെമിനാറുകള്‍, സംസ്ഥാന കൗണ്‍സില്‍ യോഗം, ഫാഷിസത്തിനെതിരേ തെരുവു ക്ലാസ്, ഗസല്‍ സന്ധ്യ എന്നിവ നടന്നിരുന്നു.