കൊല്‍ക്കത്ത: പശ്ചിമബംഗാള്‍ പഞ്ചായത്ത് തെരഞ്ഞെടുപ്പില്‍ തൃണമൂല്‍ കോണ്‍ഗ്രസിന് മികച്ച നേട്ടം. ഒടുവില്‍ വിവരം ലഭിക്കുമ്പോള്‍ 2,400ത്തിലധികം പഞ്ചായത്ത് സീറ്റുകള്‍ തൃണമൂല്‍ സ്വന്തമാക്കി.ബി.ജെ.പി 386 സീറ്റും സി.പി.എം 94 സീറ്റും സ്വന്തമാക്കിയെന്ന് തെരഞ്ഞെടുപ്പ് ഉദ്യോഗസ്ഥര്‍ വ്യക്തമാക്കി. ഇലക്ഷന്‍ കമ്മിഷന്റെ റിപ്പോര്‍ട്ട് പ്രകാരം 2,467 പഞ്ചായത്ത് സീറ്റുകളില്‍ തൃണമൂല്‍ വിജയിച്ചപ്പോള്‍ 2,863 സീറ്റുകളില്‍ മുന്നിട്ട് നില്‍ക്കുകയാണ്. ബി.ജെ.പി 231 സീറ്റിലും സി.പി.എം 163 സീറ്റിലും മുന്നിട്ട് നില്‍ക്കുന്നു. കോണ്‍ഗ്രസ് 33 സീറ്റില്‍ വിജയിച്ചപ്പോള്‍ 55 സീറ്റുകളില്‍ മുന്നിട്ട് നില്‍ക്കുകയാണ്. സ്വതന്ത്ര സ്ഥാനാര്‍ഥികള്‍ 158 സീറ്റ് സ്വന്തമാക്കിയപ്പോള്‍ 163 സീറ്റില്‍ മുന്നിട്ട് നില്‍ക്കുകയാണ്.
പലയിടത്തും ബി.ജെ.പി-സി.പി.എം കൂട്ടുകെട്ടാണ് സ്വതന്ത്രരുടെ വിജയത്തിന് കാരണമെന്നാണ് റിപ്പോര്‍ട്ട്.
ജില്ലാ പരിഷത്തിലും പഞ്ചായത്ത് സമിതികളിലും വോട്ടെണ്ണിയ മുഴുവന്‍ സീറ്റുകളിലും തൃണമൂല്‍ കോണ്‍ഗ്രസാണ് മുന്നിട്ട് നില്‍ക്കുന്നത്. വോട്ടെടുപ്പ് വേളയില്‍ വ്യാപക ആക്രമണം അരങ്ങേറിയതിനെ തുടര്‍ന്ന് കനത്ത സുരക്ഷയിലാണ് വോട്ടെണ്ണല്‍ നടന്നത്.