സാമൂഹികമായ ഇടപെടലുകള്‍ നടത്തുന്നവരാണ് നാം. മനുഷ്യ സഹജമായ നിരവധി പ്രശ്‌നങ്ങളില്‍ വിശ്വാസി ഇടപെടേണ്ടി വരും. രണ്ടാളുകള്‍ക്കിടയിലുള്ള ചെറിയ അഭിപ്രായവ്യത്യാസങ്ങള്‍ പോലും വലിയ തര്‍ക്കമായി മാറുന്നതിനു നാമെല്ലാം സാക്ഷികളാണ്. ആരെങ്കിലുമൊന്ന് ഇടപെട്ടിരുന്നെങ്കില്‍ ഇതിത്ര വലിയ പ്രശ്‌നമാകുമായിരുന്നോ എന്നു തോന്നിപ്പോകുന്ന സന്ദര്‍ഭങ്ങള്‍.
വ്യക്തികള്‍ തമ്മില്‍ തര്‍ക്കങ്ങളുണ്ടാകുമ്പോള്‍ അവ പരിഹരിക്കാന്‍ സമയോചിതമായി ഇടപെടുന്നത് ആരാധനകളെക്കാള്‍ പുണ്യമുള്ള കാര്യമാണെന്ന് തിരുനബി (സ) പഠിപ്പിച്ചു. ആരാധനകള്‍ക്കൊപ്പം വ്യക്തിപരവും കുടുംബപരവും സാമൂഹികവുമായി ബന്ധങ്ങള്‍ വിളക്കിച്ചേര്‍ക്കാനുള്ള സമയം കൂടിയാണ് റമദാന്‍. ചെറിയ അഭിപ്രായവ്യത്യാസങ്ങളുടെയും മിഥ്യാഭിമാനത്തിന്റെയും പേരില്‍ പരസ്പരം അകന്നുപോകരുത്.
നിസ്‌കാരം, വ്രതം, ദാനം എന്നിവയെക്കാള്‍ ശ്രേഷ്ഠമായ കര്‍മത്തെക്കുറിച്ച് പറഞ്ഞുതരട്ടെ എന്നു അനുചരരോട് ചോദിച്ച പ്രവാചകന്‍ തുടര്‍ന്നു പറഞ്ഞത്, 'രണ്ട് ആളുകള്‍ക്കിടയില്‍ രഞ്ജിപ്പുണ്ടാക്കുന്നതാണ് ആ പുണ്യകര്‍മം'.

അതിപ്രധാനമായ മൂന്ന് ആരാധനാകര്‍മങ്ങളെക്കാള്‍ പുണ്യമാണ് ജനങ്ങള്‍ക്കിടയിലുള്ള പ്രശ്‌നപരിഹാരത്തിന് നേതൃത്വം നല്‍കല്‍ എന്ന പ്രഖ്യാപനം. സാമൂഹികപ്രശ്‌നങ്ങളെ സമയോചിതമായി പരിഹരിച്ചില്ലെങ്കിലുണ്ടാകുന്ന ഭവിഷ്യത്തുകളുടെ സൂചന കൂടിയാണിത്.മനുഷ്യന്‍ സാമൂഹികജീവിയായതുകൊണ്ട് പ്രശ്‌നങ്ങളും സ്വാഭാവികമാണ്. ചെറിയ പ്രശ്‌നങ്ങള്‍ക്കുപോലും വര്‍ഷങ്ങളോളം പിണങ്ങി നില്‍ക്കുന്ന ചിലരുണ്ട്. കാര്യമില്ലാതെ കലഹിക്കുന്നവരുമുണ്ട്. രമ്യതയും സഹവര്‍ത്തിത്വവും അനുവര്‍ത്തിക്കണമെന്നാണ് മതം പഠിപ്പിക്കുന്നത്. അത് തകരുന്നിടത്ത് ഗുണകാംക്ഷയോടെ ഇടപെടുകയും വേണം.
വ്യക്തി ബോധമുള്ളവരായിരിക്കണം നാം. അപരരുടെ അഭിമാനത്തിന് ക്ഷതമേല്‍പിക്കരുത്. മറ്റുള്ളവരെ ചീത്തവിളിക്കുകയും അക്രമിക്കുകയും ചെയ്തവരുടെ ആരാധനകള്‍ ദൈവസന്നിധിയില്‍ നിഷ്പ്രഭമായിപ്പോകുമെന്നും അവരുടെ ആരാധനകളുടെ പുണ്യമെല്ലാം ഇരകള്‍ക്കു കൈമാറ്റം ചെയ്യപ്പെടുമെന്നും പ്രവാചകന്‍ പറഞ്ഞിട്ടുണ്ട്. കലഹത്തില്‍ പക്ഷം പിടിക്കുകയല്ല നാം ചെയ്യേണ്ടത്, പകരം പരിഹാരമന്വേഷിക്കുകയാണു വേണ്ടത്.

(ഖത്തര്‍ ആസ്ഥാനമായി പ്രവര്‍ത്തിക്കുന്ന ആഗോള മുസ്‌ലിം പണ്ഡിതസഭയുടെ ജനറല്‍ സെക്രട്ടറിയാണ് ഡോ. അലി മുഹ്‌യിദ്ദീന്‍ അലി അല്‍ ഖുര്‍റദാഗി)
മൊഴിമാറ്റം: മുഹമ്മദലി ഹുദവി വേങ്ങര