തിരുവനന്തപുരം സംസ്ഥാനത്തെ പ്ലസ്‌വണ്‍ ക്ലാസുകള്‍ ഈ മാസം 30ന് ആരംഭിക്കും. ഏകജാലക രീതിയിലുള്ള പ്രവേശനത്തിന്റെ രണ്ടാമത്തെ ലിസ്റ്റ് പ്രകാരമുള്ള പ്രവേശനം ഇന്നും നാളെയും നടക്കും. താല്‍ക്കാലിക പ്രവേശനത്തില്‍ തുടരുന്ന വിദ്യാര്‍ഥികള്‍ക്ക് ഹയര്‍ ഓപ്ഷന്‍ നിലനിര്‍ത്താന്‍ ഇനി അവസരമുണ്ടാകില്ല.
സി.ബി.എസ്.ഇയുടെ സ്‌കൂള്‍തല പരീക്ഷയില്‍ യോഗ്യത നേടിയവര്‍ക്കും 2016ലെ എസ്.എസ്.എല്‍.സി സേ പരീക്ഷ പാസായവര്‍ക്കും നേരത്തെ അപേക്ഷ നല്‍കാന്‍ കഴിയാതിരുന്ന മറ്റ് എല്ലാ വിദ്യാര്‍ഥികള്‍ക്കും വേണ്ടിയുള്ള സപ്ലിമെന്ററി അലോട്ടമെന്റ് അപേക്ഷ ജൂലൈ എട്ടു മുതല്‍ സമര്‍പ്പിക്കാം. അപേക്ഷിച്ചിട്ടും അലോട്ട്‌മെന്റ് ലഭിച്ചിട്ടില്ലാത്തവര്‍ക്കു നിലവിലുള്ള അപേക്ഷ പുതുക്കി പുതിയ ഓപ്ഷനുകള്‍ കൂട്ടിച്ചേര്‍ത്തു സപ്ലിമെന്ററി അലോട്ട്‌മെന്റിന് അപേക്ഷ നല്‍കാം. അപേക്ഷ സമര്‍പ്പിക്കുന്നതിന്റെയും മറ്റും വിശദവിവരം പിന്നീട് പ്രസിദ്ധീകരിക്കും. അതിനു ശേഷം മാത്രം അപേക്ഷ പുതുക്കിനല്‍കണമെന്നു ഡയറക്ടര്‍ അറിയിച്ചു.