ചങ്ങരംകുളം: ആലംകോട് ഏഴ് വയസുകാരനെ തെരുവുനായ കടിച്ച് കീറി. ആലംകോട് അട്ടേക്കുന്ന് താമസിക്കുന്ന ചെട്ടില വളപ്പില്‍ അബ്ദുറഹ്മാന്റെ മകന്‍ മിദ്‌ലാജി(ഏഴ്)നെയാണ് തെരുവ് നായകള്‍ ചേര്‍ന്ന് കടിച്ച് കീറിയത്. കഴിഞ്ഞദിവസം ഉച്ചക്ക് മൂന്നോടെയാണ് സംഭവം. വീടിന്റെ മുന്‍വശത്ത് കളിച്ചുകൊണ്ടിരുന്ന കുട്ടിയെയാണ് തെരുവുനായകള്‍ ചേര്‍ന്ന് കടിച്ചത്. കാലിന്റെ തുടയിലാണ് കടിയേറ്റത്. പത്ത് മീറ്ററോളം കുട്ടിയെ നായ കടിച്ചുവലിച്ച് കൊണ്ട് പോയതായി പറയുന്നു.
പരുക്കേറ്റ മിദ്‌ലാജിനെ ആദ്യം ചങ്ങരംകുളത്തെ സ്വകാര്യആശുപത്രിയിലും വിദഗ്ധ ചികില്‍സക്കായി തൃശൂര്‍ മെഡിക്കല്‍ കോളജിലും പ്രവേശിപ്പിച്ചു. ആലംകോട് ആര്യങ്കാവ് ക്ഷേത്ര പാടത്ത് കോഴിമാലിന്യം തള്ളുന്നതിനാല്‍ തെരുവുനായ ശല്യം രൂക്ഷമായിരിക്കുകയാണെന്നും പഞ്ചായത്ത് അധികൃതര്‍ വേണ്ട നടപടി സ്വീകരിക്കുന്നില്ലെന്നും പരാതികളുണ്ട്