അങ്ങാടിപ്പുറം: തിരുവനന്തപുരം സെന്‍ട്രല്‍ സ്‌റ്റേഡിയത്തില്‍ നടന്ന 23ാമത് സംസ്ഥാന ജൂനിയര്‍ സോഫ്റ്റ് ബോള്‍ ചാംപ്യന്‍ഷിപ്പ് ഇരുവിഭാഗങ്ങളിലും മലപ്പുറം വിജയകിരീടം ചൂടി. ആണ്‍കുട്ടികളുടെ മത്സരത്തില്‍ ആലപ്പുഴയേയും (7-6) പെണ്‍കുട്ടികളുടെ വിഭാഗത്തില്‍ എറണാകുളത്തേയും (17-3) പരാജയപ്പെടുത്തിയാണ് മലപ്പുറം ഇരട്ടക്കിരീടം നേടിയത്. കോഴിക്കോട് ഗവ. ആര്‍ട്‌സ് കോളജ് വിദ്യാര്‍ഥിനി സയന നയിച്ച ഗേള്‍സ് ടീം ചാംപ്യന്‍ഷിപ്പ് നിലനിര്‍ത്തിയപ്പോള്‍ ആണ്‍ കുട്ടികളുടെ വിഭാഗത്തില്‍ സര്‍വകലാശാല കാംപസ് ഹയര്‍ സെക്കന്‍ഡണ്ടറി വിദ്യാര്‍ഥി പി. സാഹിദ് നയിച്ച ടീം ചരിത്രനേട്ടത്തിലൂടെ മലപ്പുറത്തിന്റെ ആദ്യകിരീടം സ്വന്തമാക്കി. കെ.എം ജവാദ് , കെ.കെനിഹാദ്, സി.ഷുഹൈബ്, കെ.ഹംസ എന്നിവരാണ് ടീമിന്റെ പരിശീലകര്‍. കാലിക്കറ്റ് സര്‍വകലാശാല ഫിസിക്കല്‍ എജ്യുക്കേഷന്‍ കോളജ് ഡയറക്ടര്‍ സക്കീര്‍ ഹുസൈന്റെ പ്രോത്സാഹനവും പരിശീലനത്തിന് സര്‍വകലാശാല ഗ്രൗ@ണ്ട് അനുവദിച്ചതും വിജയത്തിന് സഹായകമായെന്ന് പരിശീലകര്‍ പറഞ്ഞു. അസോസിയേഷന്‍ സെക്രട്ടറി അനില്‍ എ ജോണ്‍സണ്‍ സംസാരിച്ചു.
സമാപനച്ചടങ്ങ് മുന്‍ എം.എല്‍.എ ശിവന്‍കുട്ടി ഉദ്ഘാടനം ചെയ്തു. സ്‌പോട്‌സ് കൗണ്‍സില്‍ പ്രസിഡന്റ് ടി.പി ദാസന്‍ ട്രോഫികള്‍ വിതരണം ചെയ്തു.