തിരുവനന്തപുരം: ഇഷ്ട വാഹന നമ്പരിനായി മത്സരം മുറുകിയപ്പോള്‍ ലേലത്തുക റെക്കോഡ് തിരുത്തി . തിരുവനന്തപുരം ആര്‍.ടി ഓഫിസില്‍ നടന്ന ലേലത്തിലാണ് ഫാന്‍സി നമ്പര്‍ ആയ കെ.എല്‍ 01 സി.ബി 1 ആണ് പതിനെട്ട് ലക്ഷം രൂപയ്ക്കു വിറ്റുപോയത്.

തിരുവനന്തപുരം സ്വദേശിയും ദേവി ഫാര്‍മ ഉടമയുമായ കെ.എസ് ബാലഗോപാലാണു വന്‍തുക മുടക്കി ഒന്നേമുക്കാല്‍ കോടി രൂപ വിലയുള്ള ആഡംബര കാറായ ലാന്‍ഡ് ക്രൂയിസറിനു വേണ്ടി ഇഷ്ടനമ്പര്‍ സ്വന്തമാക്കിയത്. 16 ലക്ഷം രൂപയായിരുന്നു ഇതിനു മുന്‍പുള്ള ഉയര്‍ന്ന ലേലത്തുക. തിരുവനന്തപുരം ആര്‍.ടി ഓഫിസില്‍ നടന്ന ലേലത്തിന് നാലുപേരായിരുന്നു ഉണ്ടായിരുന്നത്. അന്‍പതിനായിരം രൂപയില്‍ തുടങ്ങിയ ലേലം 13 ലക്ഷത്തില്‍ എത്തിയതോടെ എതിരാളികള്‍ പിന്മാാറി. ഈ തുകയ്ക്ക് ബാലഗോപാലിന് നമ്പര്‍ സ്വന്തമാക്കാമായിരുന്നെങ്കിലും അഞ്ചുലക്ഷം രൂപ കൂടി അധികം നല്‍കി റെക്കോഡ് തുക തികച്ച ശേഷമാണ് ലേലം അവസാനിപ്പിച്ചത്. രണ്ടുമാസം മുന്‍പു കെ.എല്‍ 01 സി.ബി 1 എന്ന ഫാന്‍സി നമ്പര്‍ വെറും രണ്ടായിരം രൂപയ്ക്കു നല്‍കിയത് വിവാദമായിരുന്നു. അന്ന് ഒത്തുകളി നടന്നെന്ന് ആരോപണം ഉയര്‍ത്തിയ ബാലഗോപാലിന്റെ അപേക്ഷ ഇത്തവണ ആര്‍.ടി.ഒ നിരസിച്ചിരുന്നു.

തുടര്‍ന്ന് ഹൈക്കോടതി ഉത്തരവിന്റെ അടിസ്ഥാനത്തിലാണു ബാലഗോപാല്‍ ലേലത്തിന് അനുമതി നേടിയത്. തൃശൂര്‍ ആര്‍.ടി ഓഫിസില്‍ 16,15,000 രൂപയ്ക്ക് പോയ കെ.എല്‍ 08 ബി.എല്‍ 1 ആയിരുന്നു ഇതുവരെയുള്ള വിലയേറിയ നമ്പര്‍. ഒത്തുകളി ആക്ഷേപം ശക്തമായതിനാല്‍ ഡെപ്യൂട്ടി ട്രാന്‍സ്‌പോര്‍ട്ട് കമ്മിഷണര്‍ സി.കെ അശോകന്റെ നേതൃത്വത്തില്‍ കര്‍ശന നിരീക്ഷണത്തിലായിരുന്നു ലേലം.
ഇന്നലെ തിരുവനന്തപുരം ആര്‍.ടി ഓഫിസില്‍ നടന്ന ഫാന്‍സി നമ്പര്‍ ലേലത്തില്‍ 28 നമ്പരുകളുടെ ലേലത്തിലൂടെ 24,935,00 രൂപയാണു സര്‍ക്കാര്‍ ഖജനാവിനു ലഭിച്ചത്.

ലാലും ഇഷ്ട നമ്പര്‍ സ്വന്തമാക്കി

കൊച്ചി: കാക്കനാട് ആര്‍.ടി ഓഫിസില്‍ നടന്ന ലേലത്തില്‍ മോഹന്‍ലാല്‍ തന്റെ ഇന്നോവ കാറിനായി ഇഷ്ടനമ്പര്‍ സ്വന്തമാക്കി. കെ.എല്‍ 7 സി.കെ 7 എന്ന നമ്പര്‍ മോഹന്‍ലാല്‍ 31,000 രൂപയ്ക്കാണ് സ്വന്തമാക്കിയത്. എന്നാല്‍ ദിലീപിന് ഇഷ്ടനമ്പരായ കെ.എല്‍ 7 സി.കെ 1 നഷ്ടമായി. കെ.എല്‍ 7 സി.കെ ശ്രേണിയിലെ ബുക്കിങ് തുടങ്ങിയപ്പോള്‍ തന്നെ സൂപ്പര്‍താരങ്ങളടക്കം നിരവധിപേര്‍ ഇഷ്ടനമ്പരിനായി തുക അടച്ചിരുന്നു. ഇഷ്ടനമ്പരുകള്‍ക്കായി നിരവധിപേര്‍ രംഗത്തുവന്നതോടെ 13,56,000 രൂപയാണ് മോട്ടോര്‍വാഹനവകുപ്പ് ലേലത്തിലൂടെ സമാഹരിച്ചത്. തന്റെ പോര്‍ഷെ കാറിനുവേണ്ടിയാണ് ദിലീപ് സി.കെ 1 നമ്പര്‍ ലക്ഷ്യം വച്ചത്.

ദിലീപിനായി പ്രതിനിധി അഞ്ച് ലക്ഷം രൂപവരെ വിളിച്ചെങ്കിലും മറ്റൊരാള്‍ 7.50 ലക്ഷം രൂപ നല്‍കി സി.കെ 1 നമ്പര്‍ സ്വന്തമാക്കുകയായിരുന്നു.