ന്യൂഡല്‍ഹി: ജഡ്ജിമാരെ നിയമിക്കുന്നതിന് അധികാരമുള്ള കൊളീജിയം സംവിധാനം രൂപീകരിക്കുന്നതിനുള്ള നടപടിക്രമങ്ങളുടെ മാര്‍ഗരേഖ കേന്ദ്രസര്‍ക്കാരിന്റെ പരിഗണനയ്ക്ക് അയച്ചതായി സുപ്രിംകോടതി ചീഫ്ജസ്റ്റിസ് ജെ.എസ് ഖെഹാര്‍ അറിയിച്ചു.

ജഡ്ജിമാരുടെ നിയമനം വൈകുന്നതു സംബന്ധിച്ച പൊതുതാല്‍പ്പര്യ ഹരജി പരിഗണിക്കവെയാണ് ചീഫ്ജസ്റ്റിസിന്റെ ബെഞ്ച് ഇക്കാര്യം അറിയിച്ചത്. ജഡ്ജിമാരുടെ നിയമനം വേഗത്തിലാക്കുമെന്നും ഇതിനുള്ള നടപടിക്രമങ്ങള്‍ യുദ്ധകാലാടിസ്ഥാനത്തില്‍ പുരോഗമിക്കുന്നുണ്ടെന്നും ചീഫ് ജസ്റ്റിസ് അറിയിച്ചു. കൊളീജിയം തയാറാക്കിയ മാര്‍ഗരേഖ ഈ മാസം 14ന് അയച്ചതായാണ് ചീഫ്ജസ്റ്റിസ് കോടതിയെ അറിയിച്ചത്.
ഇക്കാര്യം സ്ഥിരീകരിച്ച അറ്റോണി ജനറല്‍ മുകുള്‍ രോഹ്തഗി, മാര്‍ഗരേഖ നിയമമന്ത്രാലയം പരിശോധിച്ചുവരികയാണെന്നും അറിയിച്ചു.