കോഴിക്കോട്: കോഴിക്കോട് കൊയിലാണ്ടി നന്ദിക്കു സമീപം പാലൂരില്‍ കാറിനു മുകളിലേക്ക് നിയന്ത്രണം വിട്ട ടിപ്പര്‍ ലോറി മറിഞ്ഞ് രണ്ടു കുട്ടികള്‍ മരിച്ചു. കൊയിലാണ്ടി കൊല്ലം തച്ചംവീട്ടിലെ അദ്‌നാന്‍ (12), അസ്‌ല ഷെഹ്‌റിന്‍ (12) എന്നിവരാണ് മരിച്ചത്. നാലു പേര്‍ക്കു ഗുരുതരമായി പരുക്കേറ്റിട്ടുണ്ട്. ഇവരെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരിക്കുകയാണ്.

ഇന്ന് രാവിലെ ആറു മണിയോടെയായിരുന്നു അപകടം നടന്നത്. മുക്കത്തു നിന്നും മെറ്റലുമായി വടകര ഭാഗത്തേക്ക പോകുകയായിരുന്ന ടിപ്പര്‍ നിയന്ത്രണം വിട്ടു കാറിനു മുകളിലേക്ക് മറിയുകയായിരുന്നു. ടിപ്പര്‍ അമിത വേഗതയിലായിരുന്നുവെന്ന് ദൃക്‌സാക്ഷികള്‍ പറഞ്ഞു. അപകടത്തില്‍ കാര്‍ പൂര്‍ണമായും തകര്‍ന്നു. രണ്ടു കുട്ടികളും സംഭവസ്ഥലത്തു വച്ചു തന്നെ മരിച്ചിരുന്നു. കാറില്‍ ആകെ ആറുപേരാണുണ്ടായിരുന്നത്. മരിച്ച കുട്ടികളുടെ മൃതദേഹങ്ങള്‍ കൊയിലാണ്ടി താലൂക്ക് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. അദ്‌നാനും അസ്‌ല ഷെഹ്‌റിനും തിക്കോടി മര്‍കസ് സ്‌കൂളിലെ വിദ്യാര്‍ഥികളാണ്.