മണ്ണഞ്ചേരി: ബന്ധുവിന്റെ വീട്ടുമുറ്റത്ത് യുവാവ് വെട്ടേറ്റ് മരിച്ചു. മാരാരിക്കുളം തെക്ക് പഞ്ചായത്തിലെ കോര്‍ത്തുശേരിയില്‍ വാടകയ്ക്ക് താമസിക്കുന്ന ഗോപാലസദനത്തില്‍ മധുവിന്റെ മകന്‍ സുജിത്ത്(25) ആണ് മരിച്ചത്.
സംഭവവുമായി ബന്ധപ്പെട്ട് മരിച്ച സുജിത്തിന്റെ ബന്ധുവായ സുജിത്തി(35)നെ മണ്ണഞ്ചേരി പൊലിസ് കസ്റ്റഡിയിലെടുത്തു. സുജിത്തിന്റെ വീട്ടുമുറ്റത്തായിരുന്നു സംഭവം.
ഇന്നലെ പുലര്‍ച്ചെ ഒരുമണിക്ക് മണ്ണഞ്ചേരി പഞ്ചായത്തിലെ ആര്യാട് നോര്‍ത്ത് കോളനിയിലായിരുന്നു നാടിനെ നടുക്കിയ കൊലപാതകം നടന്നത്. സംഭവത്തിന് ശേഷം സുജിത്താണ് പൊലിസിനെ വീട്ടിലേക്ക് വിളിച്ചുവരുത്തിയത്. സുജിത്തിന്റെ വീട്ടുമുറ്റം മല്‍പിടുത്തം നടന്ന നിലയിലായിരുന്നെന്ന് പൊലിസ് വ്യക്തമാക്കി.
കൊല്ലപ്പെട്ട യുവാവിന്റെ തലയിലും കൈകാലുകളിലുമായി ആഴത്തിലുള്ള നാല് മുറിവുകളുണ്ട്. വിരലടയാള വിദഗ്ധരും ഡോഗ് സ്‌ക്വാഡും സംഭവസ്ഥലത്ത് പരിശോധന നടത്തി. മൃതദേഹം വണ്ടാനം മെഡിക്കല്‍കോളജ് ആശുപത്രിയില്‍ പോസ്റ്റുമോര്‍ട്ടത്തിനുശേഷം ബന്ധുക്കള്‍ക്ക് വിട്ടുക്കൊടുത്തു.