വാഷിങ്ടണ്‍: ടെക്‌സാസിലെ ഹൈസ്‌കൂളിലുണ്ടായ വെടിവയ്പ്പില്‍ 10 മരണം. കൊല്ലപ്പെട്ടവരിലേറെയും സ്‌കൂള്‍ വിദ്യാര്‍ഥികളാണ്.
പ്രാദേശിക സമയം വെള്ളിയാഴ്ച രാവിലെ ടെക്‌സാസിലെ സാന്റ ഫെ ഹൈസ്‌കൂളിലാണു തോക്കുധാരി വിദ്യാര്‍ഥികള്‍ക്കുനേരെ വെടിയുതിര്‍ത്തത്. സ്‌കൂള്‍ ആരംഭിച്ച് അധികം വൈകാതെയായിരുന്നു ആക്രമണം. സംഭവത്തില്‍ ഒരു വിദ്യാര്‍ഥിയെ പൊലിസ് കസ്റ്റഡിയിലെടുത്തിട്ടുണ്ട്. ആക്രമണം നടന്നയുടന്‍ അമേരിക്കയുടെ പതാകയും തോക്കുമായി ഒരാള്‍ ടെലിവിഷന്‍ കാമറകള്‍ക്കു മുന്‍പില്‍ പ്രത്യക്ഷപ്പെട്ടു.
ഫെബ്രുവരിയില്‍ ഫ്‌ളോറിഡയിലെ പാര്‍ക്‌ലാന്‍ഡില്‍ നടന്ന വെടിവയ്പ്പിനു ശേഷം അമേരിക്കയില്‍ നടക്കുന്ന ഏറ്റവും വലിയ സ്‌കൂള്‍ ആക്രമണമാണിത്. സംഭവത്തെ യു.എസ് പ്രസിഡന്റ് ഡൊണാള്‍ഡ് ട്രംപ് അപലപിച്ചു.