ഫറോക്ക്: രാമനാട്ടുകര നഗരസഭയിലെ 6-ാം ഡിവിഷനിലുള്‍പ്പെടുന്ന മുടക്കഴിത്താഴത്ത് മാക്കാഞ്ചിറപാടം മണ്ണിട്ടു നികത്തുന്നത് തടഞ്ഞതിനെ തുടര്‍ന്നു സംഘര്‍ഷാവസ്ഥ.
നാലു സെന്റ് വീതം വാങ്ങിയ എട്ടു ഭൂവുടമകള്‍ പാടവും ആഴത്തില്‍ വെള്ളം നില്‍ക്കുന്ന മങ്കുഴിയും മണ്ണിട്ടു നികത്തുന്നതാണ് പരിസരവാസികള്‍ സംഘടിച്ചെത്തി തടഞ്ഞത്. ഇതേതുടര്‍ന്ന് ആര്‍.ഡി.ഒ നേതൃത്വത്തിലുള്ള റവന്യു സംഘം സ്ഥലത്തെത്തി. ഏറെ നേരത്തെ തര്‍ക്കങ്ങള്‍ക്കൊടുവില്‍ തല്‍ക്കാലം നികത്തല്‍ നിര്‍ത്തിവച്ചു. ഇന്നലെ രാവിലെ എട്ടോടെയാണ് സംഭവം.
വീട് വയ്ക്കുന്നതിനായി ഭൂമി നികത്താന്‍ റവന്യു ഉള്‍പ്പെടെയുള്ളവര്‍ അനുമതി നല്‍കിയിട്ടുണ്ടെന്നാണ് ഭൂവുടമകള്‍ വാദിക്കുന്നത്.
എന്നാല്‍ പ്രദേശത്തെ നീരൊഴുക്ക് നിലക്കുമെന്ന ആശങ്കയുയര്‍ത്തിയാണ് പരിസരവാസികള്‍ ഒന്നടങ്കം പ്രതിഷേധവുമായെത്തിയത്. രാവിലെ എട്ടിനു മണ്ണുമായെത്തിയ ലോറി തടയുകയായിരുന്നു. പൊലിസ് റവന്യു അധികൃതര്‍ക്കു മുന്‍പില്‍ ഭൂവുടമകള്‍ രേഖകള്‍ കാണിച്ചെങ്കിലും പ്രദേശവാസികള്‍ ഉച്ചയ്ക്ക് മുന്‍പായി മണ്ണിടല്‍ നിര്‍ത്തിവയ്ക്കാനുള്ള ഉത്തരവ് ഹാജരാക്കുമെന്നു പറയുകയായിരുന്നു.
എന്നാല്‍ നിശ്ചിത സമയത്ത് ഉത്തരവ് കിട്ടാതിരുന്നതോടെ ഭൂവുടമകള്‍ വീണ്ടും മണ്ണിടാന്‍ നടത്തിയ ശ്രമം പരിസരവാസികള്‍ തടഞ്ഞു. ഇതു പരിസരവാസികളും ഭൂവുടമകളും തമ്മില്‍ നേരിയ സംഘര്‍ഷത്തിനിടയാക്കി. പൊലിസെത്തി ഇരുവിഭാഗത്തെയും പിരിച്ചു വിട്ടു. ഇന്നു രാവിലെ അധികൃതരുടെ സഹായത്തോടെ മണ്ണിട്ടു നികത്താനാണ് തീരുമാനം.
അതേസമയം കൊടുംവേനലിലും വെള്ളം കെട്ടിനില്‍ക്കുന്ന മങ്കുഴി മണ്ണിട്ടു നികത്തുന്നത് പ്രദേശത്തു ജലക്ഷാമത്തിനിടയാക്കുമെന്നും ഇതിനു പിന്നില്‍ ഭൂമാഫിയയ്ക്ക് പങ്കുണ്ടെന്നുമാണ് പ്രദേശവാസികള്‍ പറയുന്നത്.
എന്നാല്‍ വാടകവീട്ടിലും മറ്റും താമസിക്കുന്ന തങ്ങളെ അധികൃതരുടെ അനുമതിയുണ്ടായിട്ടും വീടുവയ്ക്കാന്‍ അനുവദിക്കാത്തത് മനുഷ്യത്വരഹിതമായ സമീപനമാണെന്ന് ഭൂവുടമകളും പറഞ്ഞു.