കണ്ണൂര്‍: ജില്ലാ പി.എസ്.സി ഓഫിസിന് ഇനി ആധുനിക മുഖം. ജില്ലാതല ഇ-ഓഫിസ് ഉദ്ഘാടനം കേരള പി.എസ്.സി ചെയര്‍മാന്‍ അഡ്വ. എം.കെ സക്കീര്‍ നിര്‍വഹിച്ചു. ഒരു ഉദ്യോഗാര്‍ഥിയുടെ അപേക്ഷ മുതല്‍ പെന്‍ഷന്‍ സമയത്ത് വരെയുള്ള കാര്യങ്ങള്‍ കൈകാര്യം ചെയ്യുന്ന വലിയ തോതിലുള്ള പ്രവര്‍ത്തനമാണ് പി.എസ്.സി ഓഫിസിലെ ജീവനക്കാര്‍ നടത്തിവരുന്നതെന്നും ജീവനക്കാരുടെ വലിയതോതിലുള്ള പ്രവര്‍ത്തനത്തിന് കൈത്താങ്ങാവുകയെന്ന ലക്ഷ്യത്തോടെയാണ് ഇ-ഓഫിസ് വത്കരണം നടപ്പാക്കിയിരിക്കുന്നതെന്ന് അദ്ദേഹം പറഞ്ഞു. പി.എസ്.സി അംഗം ടി.ടി ഇസ്മാഈല്‍ അധ്യക്ഷനായി. അഡ്വ. റോഷന്‍ റോയ് മാത്യു, അഡീഷണല്‍ ജില്ലാ ഇന്‍ഫര്‍മാറ്റിക് ഓഫിസര്‍ ഹുമൈദാ ബീവി, ആര്‍. മനോജ്, കെ.വി ഗംഗാധരന്‍, ബിനി കെ. അബ്രഹാം സംസാരിച്ചു.