നെയ്യാര്‍: ക്ഷേത്രോത്സവത്തിനിടെ പൊലിസുകാരനു കുത്തേറ്റ സംഭവത്തില്‍ രണ്ടുപേര്‍ അറസ്റ്റില്‍.കുറ്റിച്ചല്‍ പച്ചക്കാട് തടത്തരികത്ത് വീട്ടില്‍ അഖിലേഷ്( 26), ചപ്പാത്ത് പൂച്ചപ്പാറ പ്രസാദ്( 26) എന്നിവരാണ് പിടിയിലായത്. സംഭവത്തില്‍ പന്ത്രണ്ടുപേര്‍ ഉള്‍പ്പെട്ടിട്ടുണ്ടെന്ന് പൊലിസ് അറിയിച്ചു. ബാക്കിയുള്ളവര്‍ ഒളിവിലാണ്. ഡി.വൈ.എസ് .പി ബിജുമോന്റെ നേത്യത്വത്തില്‍ ഇവര്‍ക്കായി തിരച്ചില്‍ തുടരുകയാണ്. സംഭവ സ്ഥലത്തു നിന്നും പിടിച്ചെടുത്ത കാറില്‍ നിന്നു ആയുധങ്ങള്‍ കണ്ടെടുത്തു.
ഞായറാഴ്ച രാത്രി എട്ടരയോടെയായിരുന്നു സംഭവം.ഉത്തരംകോട് അരുവി മുപ്പത്തിയമ്മ ക്ഷേത്രോത്സവത്തോടനുബന്ധിച്ച് രാത്രി കുറ്റിച്ചല്‍ ഉത്തരം കോട് ചപ്പാത്ത് ജങ്‌നില്‍ നാടന്‍ പാട്ടും സ്റ്റേജ് ഷോയും നടന്നു.ഇതിനിടെ, കാറിലെത്തിയ ഒരു സംഘം സ്റ്റേജിനു മുന്നിലെത്തി നൃത്തം വച്ചു. ഇതു സ്ഥലത്തുണ്ടായിരുന്ന പൊലിസുകാരും സംഘാടകരും തടഞ്ഞതാണു സംഘര്‍ഷത്തിനു കാരണമായതെന്ന് പൊലിസ് പറഞ്ഞു. നെയ്യാര്‍ഡാം പൊലിസ് സ്റ്റേഷനിലെ സി.പി.ഒ ഗോപകുമാ(45)റിനാണ് കുത്തേറ്റത്. സംഘര്‍ഷം കൈവിട്ടു പോകുന്ന സ്ഥിതിയായപ്പോള്‍ സംഘാടകരുടെ ആഭ്യര്‍ഥന മാനിച്ചാണു സ്ഥലത്ത് ഡ്യൂട്ടിയിലുണ്ടായിരുന്ന എസ്‌ഐ: കിരണിന്റെ നേതൃത്വത്തിലുള്ള പൊലിസ് സംഘം ഇടപെട്ടത്. എസ്.ഐ കിരണിനും നിസാര പരുക്കേറ്റു.