ചങ്ങനാശേരി: നഗരത്തിലും സമീപ പഞ്ചായത്തുകളിലും ഉണ്ടാവുന്ന വൈദ്യുതി തടസ്സം പൂര്‍ണ്ണമായും ഒഴിവാക്കാന്‍ എല്ലാ വിഭാഗം ജനങ്ങളുടെയും സഹായം അഭ്യര്‍ത്ഥിച്ച് അസിസ്റ്റന്റ് എക്‌സിക്യുട്ടീവ് എഞ്ചിനിയര്‍.
നഗരത്തിലെയും സമീപ പ്രദേശങ്ങളിലേയും വൈദ്യുതി തടസ്സം പൂര്‍ണ്ണമായി നീക്കുന്നതിന് ആര്‍ എ പി ഡി ആര്‍ പി പദ്ധതി പ്രകാരമുള്ള പ്രവര്‍ത്തികള്‍ നടന്നുവരുകയാണ്. ഇതിന്റെ ഭാഗമായി ഹൈ ടെന്‍ഷന്‍ ലൈനും, ഹൈ ടെന്‍ഷന്‍ ഭൂഗര്‍ഭ കേബിളുകളും, ഹൈ ടെന്‍ഷന്‍ ഏരീയല്‍ ബഞ്ചഡ് കേബിളും, ലോ ടെന്‍ഷന്‍ കേബിള്‍ എന്നീ വര്‍ക്കുകളുടെ 25 ശതമാനം പ്രവര്‍ത്തിയും മാര്‍ച്ചിനു മുന്‍പ് പൂര്‍ത്തികരിച്ചിട്ടുണ്ട്. എന്നാല്‍ മാര്‍ച്ച് എപ്രില്‍ മാസത്തിലെ സംസ്ഥാനത്തെ പ്രധാന പരീക്ഷകള്‍ക്ക് തടസ്സമുണ്ടാകാതിരിക്കാനും, പ്രകൃതിക്ഷോഭം മൂലം ഇലക്ട്രിക്ക് ലൈനുകളിലെ അറ്റകുറ്റപണികള്‍ മൂലവും നിര്‍മ്മാണ പ്രവര്‍ത്തനങ്ങള്‍ താത്കാലികമായി നിര്‍ത്തി വക്കേണ്ടി വന്നിരുന്നു.
എന്നാല്‍ ഇപ്പോള്‍ മെയ് 31 ന് മുന്‍പ് 75 ശതമാനത്തോളം നിര്‍മ്മാണ പ്രവര്‍ത്തനങ്ങള്‍ പൂര്‍ത്തീകരിക്കുന്നതിനുള്ള ജോലികള്‍ നടന്നുവരുകയാണ് .ഇത്തരം പദ്ധതി പൂര്‍ത്തീകരിച്ചിട്ടുള്ള സ്ഥലങ്ങളില്‍ നിലവില്‍ വൈദ്യുതി തകരാറുകള്‍ കുറവാണ്.
ഇപ്പോള്‍ നടന്നുകൊണ്ടിരിക്കുന്ന നിര്‍മ്മാണ പ്രവര്‍ത്തി പൂര്‍ത്തീകരിച്ചങ്കില്‍ മാത്രമേ വൈദ്യുതി മുടക്കം പൂര്‍ണ്ണമായും മാറ്റാന്‍ കഴിയു.നിര്‍മ്മാണ പ്രവര്‍ത്തനങ്ങള്‍ പൂര്‍ത്തീകരിക്കുന്നതിനായി മെയ് 31 വരെ നഗരത്തിലും സമീപ പ്രദേശങ്ങളിലും ഭാഗികമായി വൈദ്യുതി തടസ്സം ഉണ്ടാവും. വൈദ്യുതി തടസ്സം പൂര്‍ണ്ണമായി ഇല്ലാതാക്കുന്നതിനായി കെ എസ് ഇ ബി ചങ്ങനാശേരി ഇലക്ട്രിക്കല്‍ സബ് ഡിവിഷനു കീഴില്‍ വരുന്ന ഉപഭോക്താക്കള്‍ പൂര്‍ണ്ണമായും സഹകരിക്കണമെന്ന് അസിസ്റ്റന്റ് എക്‌സിക്യുട്ടീവ് എഞ്ചിനിയര്‍ അറിയിച്ചു.