വിഴിഞ്ഞം: വിദ്യാര്‍ഥിനികളെ പഠന സ്ഥലത്ത് അതിക്രമിച്ചു കടന്ന് ഉപദ്രവിക്കുന്നത് തടഞ്ഞവരെ സാമൂഹ്യവിരുദ്ധര്‍ ക്രൂരമായി മര്‍ദിച്ചു. കാഞ്ഞിരംകുളം പുല്ലുവിളയില്‍ എസ്. എസ്. എല്‍. സി പരീക്ഷയ്ക്ക് തയാറെടുക്കുന്ന കുട്ടികള്‍ക്കായി പ്രവാസികളുടേയും പുല്ലുവിള ഇടവകയുടേയും ആഭിമുഖ്യത്തില്‍ പ്രത്യേക പരിശീലനം നല്‍കുന്ന സ്ഥലത്ത് ഞായറാഴ്ച ഉച്ചയ്ക്കായിരുന്നു സംഭവം.
ഇരുചക്ര വാഹനങ്ങളില്‍ എത്തിയ നാലംഗ സംഘം പെണ്‍കുട്ടികളെ ഉപദ്രവിക്കാന്‍ ശ്രമിച്ചപ്പോള്‍ തടഞ്ഞവര്‍ക്കാണ് മര്‍ദനമേറ്റത്. സംഘാടന ചുമതല ഉള്ള മാര്‍ട്ടിന്‍ ജൂസ, ഇടവക കമ്മിറ്റി സെക്രട്ടറിയും കോഓര്‍ഡിനേറ്ററുമായ പ്രിന്‍സ് എന്നിവരാണ് ആക്രമണത്തിന് ഇരയായത്. പ്രിന്‍സിന് ചെവിക്ക് സമീപം മുറിവേറ്റിട്ടുണ്ട്. ഇയാള്‍ പുല്ലുവിള സാമൂഹ്യ ആരോഗ്യ കേന്രത്തില്‍ ചികിത്സ തേടി. കാഞ്ഞിരംകുളം പൊലിസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.