കൂടാളി: പഞ്ചായത്തില്‍ കുടിവെള്ളത്തിനും, കാര്‍ഷിക മേഖല, അടിസ്ഥാന മേഖല എന്നിവയ്ക്കും മുന്‍ഗണന നല്‍കി ബജറ്റ് അവതരിപ്പിച്ചു.
16,57,75,540 രൂപ വരവും 16, 21,97,800 രൂപ ചെലവും 35,77,740 രൂപ നീക്കിയിരിപ്പുമുള്ള ബജറ്റാണ് വൈസ് പ്രസി. കെ.എന്‍ ബിന്ദു അവതരിപ്പിച്ചത്. നവകേരള മിഷന്റെ പാത പിന്തുടര്‍ന്ന് ജല വിഭവം, ശുചിത്വ മാലിന്യ സംസക്കരണം ,ജൈവ കൃഷിരീതിക്ക് പ്രാധാന്യം നല്‍കി. കാര്‍ഷിക വികസനം, ലൈഫ്, ആര്‍ദ്രം, പൊതു വിദ്യാഭ്യാസ സംരക്ഷണ യജ്ഞം എന്നീ മേഖലകളുടെ സമന്വയ സാധ്യതകള്‍ പരമാവധി പ്രയോജനപ്പെടുത്തി പുതിയ പദ്ധതികള്‍ക്ക് രൂപം നല്‍കും.
കാര്‍ഷിക മേഖല വികസനം 68 ലക്ഷം, പരിസര ശുചിത്വം, മാലിന്യ സംസ്‌കരണം എന്നിവ ലക്ഷ്യമിട്ട് ഉറവിട മാലിന്യ സംസ്‌ക്കരണത്തിലൂടെ വഴിയോര സൗന്ദര്യവല്‍ക്കരണത്തിന് 20 ലക്ഷം, പഞ്ചായത്തിന്റെ വിവിധ ഭാഗങ്ങളില്‍ പൈപ്പ് ലൈന്‍ നീട്ടി കുടിവെള്ളമെത്തിക്കുന്നതിനും ജലസ്രോതസുകള്‍ സംരക്ഷിക്കുന്നതിനും 60 ലക്ഷം, ആരോഗ്യ മേഖലയില്‍ സാന്ത്വന പരിചരണം, മരുന്നു വാങ്ങല്‍, സബ്‌സെന്ററുകളില്‍ അടിസ്ഥാന സൗകര്യം, പകര്‍ച്ചവ്യാധി നിയന്ത്രണം തുടങ്ങിയവയ്ക്ക് 20 ലക്ഷം എന്നിങ്ങനെ തുക വകയിരുത്തി.