മാവൂര്‍: ചെറൂപ്പയില്‍ കാറ് ബൈക്കിലിടിച്ച് മൂന്നുപേര്‍ക്ക് പരുക്ക്. ചെറൂപ്പ ബാങ്കിനു സമീപം കോഴിക്കോട് ഭാഗത്തേക്ക് പോവുകയായിരുന്ന കാര്‍ കുറ്റിക്കാട്ടൂര്‍ ഭാഗത്ത് നിന്നു മാവൂരിലേക്ക് വരികയായിരുന്ന ബൈക്കിലിടിച്ചാണ് അപകടം.
ബൈക്കില്‍ സഞ്ചരിക്കുകയായിരുന്ന മാവൂര്‍ പനങ്ങോട് മന്നിങ്ങാത്തൊടി അല്‍ത്താഫ് (18), മാതാവ് ഷെറീന (37), ഇളയ സഹോദരി ഹിബാ ഫാത്തിമ (രണ്ട് ) എന്നിവര്‍ക്കാണ് പരുക്കേറ്റത്.
അല്‍ത്താഫിന്റെയും മാതാവിന്റെയും പരുക്ക് ഗുരുതരമാണ്. ഇവര്‍ക്ക് തലക്കും കൈകാലുകള്‍ക്കും പരുക്കേറ്റിട്ടുണ്ട്. പെരിങ്ങൊളം ഗവ. ഹയര്‍ സെക്കന്‍ഡറി സ്‌കൂളില്‍ പ്ലസ് ടുവിന് അഡ്മിഷനു പോയി തിരിച്ചുവരുന്നതിനിടെയാണ് അപകടം. നിയന്ത്രണംവിട്ട കാര്‍ തെറ്റായ ദിശയില്‍ വരികയായിരുന്നുവെന്ന് ദൃക്‌സാക്ഷികള്‍ പറയുന്നു. ഇടിയുടെ ആഘാതത്തില്‍ ഇവര്‍ സഞ്ചകരിച്ചിരുന്ന ബൈക്ക് പൂര്‍ണമായും തകര്‍ന്നിട്ടുണ്ട്.