തലശ്ശേരി: ആര്‍.എസ്.എസ് പ്രവര്‍ത്തകന്‍ ഷമേജ് കൊലക്കേസില്‍ പിടിയിലായ പ്രതികള്‍ക്ക് ടി.പി ചന്ദ്രശേഖരന്‍ വധക്കേസിലെ പ്രതികളുമായ് അടുത്ത ബന്ധമെന്ന് പൊലിസ് കണ്ടെത്തി.
വിവിധ സ്ഥലങ്ങളില്‍ ഒഴിവില്‍ കഴിഞ്ഞ ശേഷമാണ് പ്രതികള്‍ ഇപ്പോള്‍ പിടിയിലായത്. കേസില്‍ ഇന്നലെ അറസ്റ്റിലായ ഷബിനും ഷാജിയും ഷമേജിനെ വെട്ടി വീഴ്ത്തുകയായിരുന്നു. വെട്ട് കൊണ്ട് ഓടിയ ഷമേജിനെ ബൈക്കില്‍ പിന്‍തുടര്‍ന്ന് ഇടിച്ച് വീഴ്ത്തുകയായിരുന്നെന്ന് പ്രതികള്‍ പൊലിസിന് കുറ്റസമ്മത മൊഴി നല്‍കി. ലിജിനാണ് ഷമേജിനെ ബൈക്ക് കൊണ്ട് ഇടിച്ച് വീഴ്ത്തിയത്. പിടിയിലായ പ്രതികളുടെ മൊഴികളുടെ അടിസ്ഥാനത്തില്‍ കൂടുതല്‍ അറസ്റ്റ് ഉടനുണ്ടാകും.
പ്രതികളുമായി അടുത്ത ബന്ധമുള്ള 30 പേരുടെ ഫോണ്‍ കോളുകള്‍ പൊലിസ് പരിശോധിച്ചിരുന്നു. ടി.പി കേസിലെ പ്രതി കൊടി സുനിയുള്‍പ്പെടെയുള്ളവരുമായ് ബന്ധം പുലര്‍ത്തിയിരുന്നവരാണ് ഇപ്പോള്‍ പിടിയിലായതെന്ന് പൊലിസ് പറഞ്ഞു. സി.പി.എം നേതാവ് പള്ളൂരിലെ കണ്ണിപ്പൊയില്‍ ബാബുവിനെ കൊലപ്പെടുത്തത് അറിഞ്ഞയുടന്‍ ഒരു സംഘം ആര്‍.എസ്.എസ് പ്രവര്‍ത്തകനെ വകവരുത്താന്‍ ഇറങ്ങിപ്പുറപ്പെടുകയായിരുന്നു.
ഇപ്പോള്‍ അറസ്റ്റിലായ പ്രതികള്‍ സി.പി.എമ്മിന്റെ സര്‍ജിക്കല്‍ ടീമിലെ അംഗങ്ങളാണെന്ന് അന്വേഷണ സംഘം പറഞ്ഞു. മെയ് ഏഴിന് രാത്രി 10.30 ഓടെ മാഹി കലാഗ്രാമത്തിന് മുന്നില്‍ വെച്ചാണ് ഓട്ടോ തടഞ്ഞ് ഷമേജിനെ വെട്ടിക്കൊലപ്പെടുത്തിയത്.