കോട്ടയം: ആര്‍പ്പൂക്കര പഞ്ചായത്തില്‍ തൊണ്ണംകുഴിയ്ക്ക് സമീപം പ്രവര്‍ത്തിക്കുന്ന മാവേലി സ്റ്റോര്‍ മാറ്റുന്നതിനെതിരേ നാട്ടുകാര്‍ രംഗത്ത്. നിലവില്‍ തൊണ്ണംകുഴിയില്‍ പ്രവര്‍ത്തിക്കുന്ന മാവേലി സ്റ്റോര്‍ ആര്‍പ്പൂക്കര പഞ്ചായത്തിന്റെ ഷോപ്പിങ്് കോംപ്ലക്‌സിലേക്ക് മാറ്റാനുള്ള ശ്രമമാണ് നടക്കുന്നതെന്ന് നാട്ടുകാര്‍ ആരോപിക്കുന്നു. ഒരു വര്‍ഷം മുന്‍പ് പനമ്പാലത്തിനു സമീപം മാവേലി സ്റ്റോറിനായി കെട്ടിടം പണിയുകയും ഈ കെട്ടിടത്തില്‍ ബോര്‍ഡുവരെവയ്ക്കുകയും ചെയ്തു.
എന്നാല്‍ ഇതുവരെയും മാവേലി സ്റ്റോര്‍ പുതിയ കെട്ടിടത്തിലേക്ക് മാറ്റാനുള്ള നടപടിയുണ്ടായിട്ടില്ലെന്ന് പ്രദേശവാസികള്‍ പറയുന്നു. പുതിയ കെട്ടിടത്തിനു നമ്പര്‍ ഇതുവരെയും ലഭിച്ചിട്ടില്ലെന്നാണ് ബന്ധപ്പെട്ട ഉദ്യോഗസ്ഥര്‍ പറയുന്നത്. പനമ്പാലത്ത് നിര്‍മാണം പൂര്‍ത്തിയാക്കിയ കെട്ടിടത്തിനു പഞ്ചായത്ത് അധികൃതര്‍ എത്രയും വേഗം നമ്പര്‍ നല്‍കി മാവേലി സ്റ്റോര്‍ പുതിയ കെട്ടിടത്തിലേക്ക് മാറ്റണമെന്നാണ് നാട്ടുകാരുടെ ആവശ്യം.