കൊച്ചി: സാഹിത്യത്തിലെ സമഗ്ര സംഭാവനയ്ക്കുള്ള ഹരിശ്രീ പുരസ്‌കാരം കവിയും ഗാനരചയിതാവുമായ റഫീഖ് അഹമ്മദിന്. 10,000 രൂപയും പ്രശസ്തി പത്രവും അടങ്ങുന്നതാണ് പുരസ്‌കാരം ഇന്ന് എറണാകുളം അധ്യാപക ഭവനില്‍ നടക്കുന്ന ചടങ്ങില്‍ കവി പ്രഭാവര്‍മ സമ്മാനിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ഹരിശ്രീ കവിതാ മത്സര പരമ്പര, കഥാമത്സരം എന്നിവയ്ക്കുള്ള പുരസ്‌കാരങ്ങളും വിവിധ മത്സരങ്ങളിലെ പ്രോത്സാഹന സമ്മാനങ്ങളും ചടങ്ങില്‍ വിതരണം ചെയ്യും. കഴിഞ്ഞവര്‍ഷം മുതലാണ് ഓണ്‍ലൈന്‍ സാഹിത്യ കൂട്ടായ്മയായ ഹരിശ്രീ സാഹിത്യ പുരസ്‌കാരങ്ങള്‍ ഏര്‍പ്പെടുത്തിയത്. മുരളീധരന്‍ വലിയ വീട്ടില്‍, ഉമാദേവി വി.ജി, പ്രസാദ് സി.വിജയന്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.