പയ്യന്നൂര്‍: രാമന്തളിയിലെ ജനത ശുദ്ധജലത്തിനായി സഹനസമരം നടത്തുമ്പോള്‍ സമരം നടത്തുന്നവരെ ഭീഷണിപ്പെടുത്തുന്ന സമീപനം തുടര്‍ന്നാല്‍ രാമന്തളിക്കാര്‍ ഒറ്റയ്ക്കല്ലെന്നു മനസിലാക്കണമെന്നു ഡി.സി.സി പ്രസിഡന്റ് സതീശന്‍ പാച്ചേനി.
നാവിക അക്കാദമി മാലിന്യപ്ലാന്റിലെ അപാകതകള്‍ പരിഹരിക്കണമെന്നാവശ്യപ്പെട്ടു കോണ്‍ഗ്രസ് ഉപവാസസമരത്തില്‍ സംസാരിക്കുകയായിരുന്നു പാച്ചേനി. നാവിക അക്കാദമിയോട് ചേര്‍ന്ന പ്രദേശത്ത് വീട് നിര്‍മിക്കാന്‍ അനുമതി നല്‍കിയവര്‍ക്കുള്ള വ്യവസ്ഥകള്‍ പിന്‍വലിക്കുന്ന നടപടിയുമായി മുന്‍പോട്ടു പോയാല്‍ ജനങ്ങളെ അണിനിരത്തി ചെറുത്ത് തോല്‍പ്പിക്കും. നാവിക അക്കാദമി പോലുള്ള ഉന്നതമായ സ്ഥാപനം ജനങ്ങളുടെ ജീവല്‍ പ്രശ്‌നത്തെ നിസംഗതയോടെ കാണരുത്. മാലിന്യ പ്ലാന്റ് മാറ്റി സ്ഥാ പിക്കുന്നതിന് സര്‍ക്കാര്‍ നടപടി സ്വീകരിക്കമെന്നും പാച്ചേനി പറഞ്ഞു.
ഉപവാസ സമരം അഡ്വ. സണ്ണി ജോസഫ് എം.എല്‍.എ ഉദ്ഘാടനം ചെയ്തു. അഡ്വ. ഡി.കെ ഗോപിനാഥ് അധ്യക്ഷനായി. എ.പി അബ്ദുല്ലക്കുട്ടി, കെ പ്രഭാകരന്‍, സി രഘുനാഥ്, എന്‍ രാമകൃഷ്ണന്‍, എം.പി ഉണ്ണികൃഷ്ണന്‍, അഡ്വ.റ ഷീദ് കവ്വായി, ബ്രിജേഷ് കുമാര്‍, രജനി രമാനന്ദ്, എസ്.എ ഷുക്കൂര്‍ ഹാജി, ബി സജിത്ത് ലാല്‍, എം.വി കോരന്‍, ഇ.സി ഭാസ്‌ക്കരന്‍ സംസാരിച്ചു. വൈകുന്നേരം സമരസമിതി പ്രവര്‍ത്തകര്‍ സതീശന്‍ പാച്ചേനിക്ക് നാരങ്ങാനീര് നല്‍കി ഉപവാസം അവസാനിപ്പിച്ചു.