റിയാദ്: സഊദി ഭരണകൂടം പ്രഖ്യാപിച്ച മൂന്നു മാസത്തെ പൊതുമാപ്പിന് അര്‍ഹരായവരില്‍ ഒരു വിഭാഗത്തിന് വേറൊരു വകുപ്പിനെയും സമീപിക്കേണ്ടതില്ലെന്നും നേരിട്ട് അതിര്‍ത്തികള്‍ വഴി യാത്ര തിരിക്കാമെന്നും ആഭ്യന്തര മന്ത്രാലയ വക്താവ് മേജര്‍ ജനറല്‍ മന്‍സൂര്‍ അല്‍തുര്‍ക്കി അറിയിച്ചു. ഹജ്, ഉംറ, സന്ദര്‍ശന വിസകളില്‍ രാജ്യത്തെത്തി വിസാ കാലാവധിക്കുള്ളില്‍ സ്വദേശങ്ങളിലേക്ക് തിരിച്ചുപോകാതെ അനധികൃതമായി രാജ്യത്ത് തങ്ങുന്നവര്‍ക്കാണ് എയര്‍പോര്‍ട്ടുകളും തുറമുഖങ്ങളും കരാതിര്‍ത്തി പോസ്റ്റുകളും വഴി നേരിട്ട് സ്വദേശങ്ങളിലേക്ക് തിരിച്ചുപോകാന്‍ സാധിക്കുക. എക്‌സിറ്റ് നടപടികള്‍ക്ക് ഇവര്‍ മറ്റൊരു വകുപ്പിനെയും സമീപിക്കേണ്ടതില്ലെന്നും അദ്ദേഹം വ്യക്തമാക്കി.

അതേസമയം, തൊഴില്‍ വിസയിലെത്തി നിയമ ലംഘകരായി മാറിയവര്‍ ജവാസാത്തിന്റെയും തൊഴില്‍ മന്ത്രാലയത്തിന്റെയും ഓണ്‍ലൈന്‍ സേവനങ്ങള്‍ വഴിയാണ് എക്‌സിറ്റ് നടപടികള്‍ പൂര്‍ത്തിയാക്കേണ്ടത്. ഇതിന് സാധിക്കാത്തവര്‍ ജവാസാത്ത് ഡയറക്ടറേറ്റിനു കീഴിലെ വിദേശി വകുപ്പിനെ സമീപിക്കണം. കൂടാതൈ, അനധികൃതമായി രാജ്യത്ത് പ്രവേശിച്ച, തിരിച്ചറിയല്‍ രേഖകളില്ലാത്തവരും ഹുറൂബാക്കപ്പെട്ടവരും അനുമതി പത്രമില്ലാതെ ഹജ് നിര്‍വഹിക്കുന്നതിന് ശ്രമിച്ച് നിയമങ്ങള്‍ ലംഘിച്ചവരും എക്‌സിറ്റ് നടപടികള്‍ക്ക് തൊട്ടടുത്ത വിദേശി വകുപ്പിനെയാണ് സമീപിക്കേണ്ടതെന്നും ആഭ്യന്തര മന്ത്രാലയ വക്താവ് പറഞ്ഞു.
മൂന്നു വര്‍ഷം മുമ്പ് പ്രഖ്യാപിച്ച പൊതുമാപ്പ് പ്രയോജനപ്പെടുത്തി 25 ലക്ഷത്തിലേറെ നിയമ ലംഘകര്‍ സ്വദേശങ്ങളിലേക്ക് തിരിച്ചുപോയിരുന്നെന്നും അദ്ദേഹം പറഞ്ഞു.
മൂന്നു വര്‍ഷം മുമ്പ് നടത്തിയ പൊതുമാപ്പിന്റെ തുടര്‍ച്ചയാണ് ഇപ്പോള്‍ പ്രഖ്യാപിച്ചിരിക്കുന്ന പൊതുമാപ്പ്. ഇത്തവണ കൂടുതല്‍ സര്‍ക്കാര്‍ വകുപ്പുകള്‍ ഇതില്‍ പങ്കാളിത്തം വഹിക്കും. 19 സര്‍ക്കാര്‍ വകുപ്പുകളാണ് പൊതുമാപ്പ് കാമ്പയിനില്‍ പങ്കെടുക്കുന്നതെന്നും മേജര്‍ ജനറല്‍ മന്‍സൂര്‍ അല്‍തുര്‍ക്കി പറഞ്ഞു.