ഡോന്‍ഗെ സിറ്റി: യുവ മുന്നേറ്റ താരം ലാല്‍റെംസിയാമി അവസാന നിമിഷങ്ങളില്‍ നേടിയ ഗോളില്‍ സമനില പിടിച്ച് അപരാജിതരായി നിലവിലെ ചാംപ്യന്‍മാരായ ഇന്ത്യ ഏഷ്യന്‍ ചാംപ്യന്‍സ് ട്രോഫി വനിതാ ഹോക്കി പോരാട്ടത്തിന്റെ ഫൈനലിനൊരുങ്ങി. തുടര്‍ച്ചയായ മൂന്ന് വിജയങ്ങളുമായി ഫൈനലുറപ്പിച്ച് അവസാന ഗ്രൂപ്പ് പോരാട്ടത്തില്‍ കൊറിയയെ നേരിട്ട ഇന്ത്യ 1-1ന് മത്സരം സമനിലയില്‍ അവസാനിപ്പിച്ചു. ഇന്ന് നടക്കുന്ന ഫൈനലില്‍ ഇന്ത്യ- കൊറിയ ടീമുകള്‍ വീണ്ടും നേര്‍ക്കുനേര്‍ വരും. നേരത്തെ ഇന്ത്യ 4-1ന് ജപ്പാനേയും 3-1ന് ചൈനയേയും 3-2ന് മലേഷ്യയേയും വീഴ്ത്തിയാണ് ഫൈനലുറപ്പിച്ചത്.
തുടക്കം മുതല്‍ അക്രമിച്ചു കളിച്ച ലോക ഒന്‍പതാം നമ്പര്‍ ടീമായ കൊറിയ നാലാം ക്വാര്‍ട്ടറിന്റെ തുടക്കത്തിലാണ് ലീഡെടുത്തത്. മത്സരം കൊറിയ ജയിക്കുമെന്ന പ്രതീതി നിലനിന്നെങ്കിലും അവസാന നിമിഷം ലഭിച്ച പെനാല്‍റ്റി വലയിലാക്കി സമനില പിടിക്കാനുള്ള ഗുര്‍ജിതിന്റെ ശ്രമം കൊറിയന്‍ ഗോള്‍ കീപ്പറുടെ പാഡില്‍ തട്ടിത്തെറിച്ചു.
റീബൗണ്ടായി ലഭിച്ച പന്ത് ഒട്ടും സമയം പാഴാക്കാതെ ഗോളിലേക്ക് വഴിതിരിച്ചുവിട്ട് ലാല്‍റെംസിയാമി ഇന്ത്യയെ പരാജയത്തില്‍ നിന്ന് കരകയറ്റുകയായിരുന്നു.