ന്യൂഡല്‍ഹി: മിഡില്‍ ഈസ്റ്റ് രാജ്യങ്ങളില്‍ നിന്ന് യു.എസിലേക്കുള്ള വിമാന യാത്രക്കാര്‍ക്ക് ഇലക്ട്രോണിക്ക് ഉപകരണങ്ങള്‍ കൊണ്ടുപോവുന്നതിനേര്‍പ്പെടുത്തിയ നിയന്ത്രണം ഇന്ത്യക്കാരേയും ബാധിക്കും. ഈ രാജ്യങ്ങള്‍ക്കിടയില്‍ യാത്ര ചെയ്യുന്ന നൂറു കണക്കിന് ഇന്ത്യക്കാര്‍ക്കും ഇത് ദുരിതമുണ്ടാക്കുമെന്നാണ് റിപ്പോര്‍ട്ട്.

മുസ്‌ലിം ഭൂരിപക്ഷ രാജ്യങ്ങളിലെ 10 വിമാനത്താവളങ്ങളില്‍ നിന്ന് യു.എസിലേക്കു പോവുന്ന വിമാനങ്ങളിലാണ് ഇലക്ട്രോണിക് ഉപകരണങ്ങള്‍ക്ക് നിയന്ത്രണം ഏര്‍പ്പെടുത്തിയത്. ഈജിപ്ത്, തുര്‍ക്കി, കുവൈത്ത്, ഖത്തര്‍, മൊറോക്കൊ, ജോര്‍ദാന്‍, സഊദി അറേബ്യ, യു.എ.ഇ എന്നീ രാജ്യങ്ങളില്‍ നിന്നുള്ള വിമാനങ്ങളിലാണ് നിയന്ത്രണം.

ഇലക്ട്രോണിക് ഉപകരണങ്ങളില്‍ സ്‌ഫോടക വസ്തു വച്ച് തീവ്രവാദി ആക്രമണം ഉണ്ടാവുമെന്നു കാട്ടിയാണ് യു.എസിന്റെ പുതിയ നീക്കം.

ദുബായ്, അബുദാബി, ഇസ്താംബൂള്‍ തുടങ്ങിയ വിമാനത്താവളങ്ങളില്‍ നിന്ന് നിരവധി ഇന്ത്യക്കാരാണ് യു.എസിലേക്കു പറക്കുന്നത്. ഇവര്‍ക്ക് പുതിയ നിയമം വലിയ തടസ്സങ്ങളുണ്ടാക്കും.