കൊച്ചി: ഡ്യൂട്ടി തടസപ്പെടുത്തിയെന്നാരോപിച്ച് ബൈക്ക് യാത്രികനെ പൊലിസ് മര്‍ദിച്ചതായി പരാതി. തൃപ്പൂണിത്തുറ സ്വദേശി ശരത്തിനാണ് മര്‍ദനമേറ്റത്. പരുക്കേറ്റ ശരത്തിനെ എറണാകുളം ജനറല്‍ ആശുപത്രിയില്‍ പ്രവേശിച്ചു. ഇന്നലെ ഉച്ചക്ക് 12ന് കച്ചേരിപ്പടിയിലാണ് സംഭവം. ബൈക്ക് ഓടിച്ച് വരികയായിരുന്ന ശരത്തിനെ മറഞ്ഞുനിന്ന് ട്രാഫിക് പൊലിസ് കൈകാണിച്ച് വീഴ്ത്തുകയായിരുന്നുവെന്ന് നാട്ടുകാര്‍ പറഞ്ഞു. നിലത്തുവീണ ശരത്തിനെ മുടിയില്‍ പിടിച്ചുയര്‍ത്തി മര്‍ദിച്ചു. നാട്ടുകാര്‍ സംഭവ സ്ഥലത്തെത്തിയതോടെ ബൈക്കിടിച്ചെന്ന് പറഞ്ഞ് പൊലിസ് ആശുപത്രിയിലേക്ക് പോയി.
അശ്രദ്ധയോടെ മൊബൈലില്‍ സംസാരിച്ച് ബൈക്കോടിച്ച് വന്ന ശരത്തിനെ കൈകാണിച്ച് നിര്‍ത്താന്‍ ശ്രമിച്ചപ്പോള്‍ നിര്‍ത്താതെ പൊലിസ് ഉദ്യോഗസ്ഥന്റെ ദേഹത്തിടിക്കുകയായിരുന്നുവെന്ന് കൊച്ചി സിറ്റി വെസ്റ്റ് എസ്.ഐ പത്രക്കുറിപ്പില്‍ അറിയിച്ചു. അപകടത്തില്‍ പൊലിസുകാരന്‍ സുധീഷിന് ഗുരുതരമായി പരുക്കേറ്റതായി പറയുന്നു.