ഹൊസംഗബാദ്: തെരഞ്ഞെടുപ്പ് തോല്‍വിയില്‍ രാഹുല്‍ ഗാന്ധി റെക്കോര്‍ഡിട്ടെന്ന് കാണിച്ച് മധ്യപ്രദേശ് എന്‍ജിനീയറിങ് വിദ്യാര്‍ഥി ഗിന്നസ് ബുക്കിനെ സമീപിച്ചു. രാജ്യത്തെ 27 ഓളം തെരഞ്ഞെടുപ്പുകളില്‍ തോല്‍വി ഏറ്റുവാങ്ങേണ്ടി വന്ന രാഹുലിന് ഗിന്നസ് റെക്കോര്‍ഡ് നല്‍കണമെന്നാണ് വിദ്യാര്‍ഥിയായ വിശാല്‍ ദിവാന്റെ ആവശ്യം.
തന്റെ ആവശ്യം ഗിന്നസ് അധികൃതരെ കത്തിലൂടെ അറിയിച്ച വിശാല്‍ ഇതിനായി അംഗത്വ ഫീസും അടച്ചു. കോണ്‍ഗ്രസ് തുടര്‍ച്ചയായി തെരഞ്ഞെടുപ്പുകളില്‍ തോല്‍ക്കുന്നത് പ്രചാരണ പരിപാടികളിലും വാര്‍ത്താ സമ്മേളനങ്ങളിലും രാഹുലിന്റെ സജീവ സാന്നിധ്യമുള്ളതിനാലാണെന്നാണ് വിശാലിന്റെ അഭിപ്രായം.
വിദ്യാര്‍ഥിയുടെ അപേക്ഷ ഗിന്നസ് അധികൃതര്‍ സ്വീകരിച്ചെന്നും അറിയുന്നു. എന്നാല്‍ ഇതുപോലുള്ള അപേക്ഷകള്‍ ഗിന്നസ് അധികൃതര്‍ അംഗീകരിക്കുമോ എന്ന് വ്യക്തമല്ല.
ഉത്തര്‍പ്രദേശില്‍ വമ്പന്‍ തോല്‍വി ഏറ്റുവാങ്ങിയ രാഹുല്‍ നേതൃസ്ഥാനം ഒഴിയണമെന്ന് മുതിര്‍ന്ന നേതാക്കള്‍ തന്നെ ആവശ്യപ്പെടുന്ന സാഹചര്യത്തിലാണ് പുതിയ പരിഹാസം.