ന്യൂഡല്‍ഹി: കോടതിക്കു പുറത്ത് ചര്‍ച്ചയിലൂടെ ബാബരി മസ്ജിദ് തര്‍ക്കവിഷയം പരിഹരിക്കണമെന്ന സുപ്രിംകോടതിയുടെ നിര്‍ദേശം മുസ്‌ലിം സംഘടനകള്‍ തള്ളി. കോടതിക്കു പുറത്തുള്ള കൂടിയാലോചനകള്‍ നേരത്തെ നടന്നതാണെന്നും എന്നാല്‍ അവയെല്ലാം പരാജയമായിരുന്നുവെന്നും ബാബരി മസ്ജിദ് ആക്ഷന്‍ കൗണ്‍സില്‍ കണ്‍വീനര്‍ അഡ്വ. സഫരിയാബ് ജീലാനി പറഞ്ഞു.
വിഷയത്തില്‍ സുപ്രിംകോടതി ചീഫ് ജസ്റ്റിസ് മധ്യസ്ഥനാവുകയോ അല്ലെങ്കില്‍ സുപ്രിംകോടതി ജഡ്ജിമാരുടെ ഒരുസംഘത്തെ നിര്‍ദേശിക്കുകയോ കോടതി സ്വയം വിഷയത്തില്‍ വാദം കേള്‍ക്കുകയോ ചെയ്യുന്നതില്‍ തങ്ങള്‍ക്കു വിശ്വാസമുണ്ട്. കോടതിക്കു പുറത്തുള്ള ഒത്തുതീര്‍പ്പ് സ്വീകാര്യമല്ല.
കോടതിക്കു പുറത്ത് ഒത്തുതീര്‍പ്പ് നടത്തണമെന്ന തരത്തിലുള്ള ഉത്തരവ് കോടതി പുറപ്പെടുവിക്കുകയാണെങ്കില്‍ ഭാവി നടപടികളെക്കുറിച്ചു ചിന്തിക്കുമെന്ന് അദ്ദേഹം പറഞ്ഞു. കേസില്‍ സുന്നി വഖ്ഫ് ബോര്‍ഡിനെ പ്രതിനിധീകരിക്കുന്ന അഭിഭാഷകന്‍ കൂടിയാണ് ജീലാനി.
രാജീവ്ഗാന്ധിയും ചന്ദ്രശേഖറും പ്രധാനമന്ത്രിമാരായിരിക്കെ നടന്ന മധ്യസ്ഥ ചര്‍ച്ചകളും ഫലം കണ്ടില്ലെന്ന് അസദുദ്ദീന്‍ ഉവൈസി എം.പി അഭിപ്രായപ്പെട്ടു. ചീഫ്ജസ്റ്റിസില്‍ തങ്ങള്‍ക്കു വിശ്വാസമുണ്ടെന്നും അദ്ദേഹം തന്നെ മുന്‍കൈയെടുക്കുകയാണെങ്കില്‍ ഞങ്ങളും സന്നദ്ധമാണെന്നും അഖിലേന്ത്യാ മുസ്‌ലിം വ്യക്തിനിയമ ബോര്‍ഡ് ജനറല്‍ സെക്രട്ടറി മൗലാനാ വലി റഹ്മാനി പറഞ്ഞു.
അബുല്‍ ഹസന്‍ അലി നദ്‌വി അധ്യക്ഷനായിരിക്കെ പലതവണ അയോധ്യയിലെ പുരി ശങ്കരാചാര്യരുമായി നേരിട്ടുചര്‍ച്ചനടത്തിയിരുന്നുവെന്നും എന്നാല്‍ രാഷ്ട്രീയകക്ഷികളാണ് അതിനു തുരങ്കംവച്ചതെന്നും ബോര്‍ഡ് അംഗം മൗലാനാ ഖാലിദ് റശീദി പറഞ്ഞു.

എങ്ങനെ ആയാലും രാമക്ഷേത്രം
നിര്‍മിക്കണമെന്ന് ആര്‍.എസ്.എസ്

ന്യൂഡല്‍ഹി: ചര്‍ച്ചയിലൂടെയോ, നിയമനിര്‍മാണത്തിലൂടെയോ എങ്ങനെ ആയാലും അയോധ്യയില്‍ രാമക്ഷേത്രം നിര്‍മിക്കണമെന്ന് ആര്‍.എസ്.എസ് പ്രചാര്‍പ്രമുഖ് മന്‍മോഹന്‍ വൈദ്യ ആവശ്യപ്പെട്ടു.
രാമക്ഷേത്ര വിഷയം എത്രയും പെട്ടെന്ന് തീര്‍പ്പാക്കണമെന്നും ക്ഷേത്ര നിര്‍മാണത്തില്‍ എല്ലാ ഇന്ത്യക്കാരും പങ്കാളികളാകണമെന്നും ആര്‍.സ്.എസ് നേതാവ് ദത്തത്രേയ ഹൊസബാലെ പറഞ്ഞു.
കോടതിയുടെ നിര്‍ദേശം സ്വാഗതാര്‍ഹമാണെന്ന് ബാബരി മസ്ജിദ് തകര്‍ത്ത കേസില്‍ പ്രതിയായ കേന്ദ്രമന്ത്രി ഉമാഭാരതിയും അഭിപ്രായപ്പെട്ടു.

കോടതി തന്നെ അന്തിമ വിധി
പറയട്ടെ: ഇ.ടി മുഹമ്മദ് ബഷീര്‍

ന്യൂഡല്‍ഹി: ബാബരി മസ്ജിദ്-രാമജന്മഭൂമി തര്‍ക്കം പരിഹരിക്കുന്നതിന് സുപ്രിംകോടതി തന്നെ അന്തിമവിധി പറയട്ടെയെന്ന് മുസ്്‌ലിംലീഗ് അഖിലേന്ത്യാ ഓര്‍ഗനൈസിങ് സെക്രട്ടറി ഇ.ടി മുഹമ്മദ് ബഷീര്‍ എം.പി. പ്രശ്‌നത്തില്‍ കോടതിയുടെ അന്തിമ വിധിയെ മാനിക്കുമെന്ന നിലപാടാണ് ലീഗിന്റെത്.
എന്നാല്‍ ഇപ്പോള്‍ വന്നത് ചീഫ് ജസ്റ്റിസിന്റെ അഭിപ്രായപ്രകടനമാണ്. സുപ്രിംകോടതി മുന്‍പാകെ നിലവിലുള്ള കേസിലെ മൗലികവശം അവിടത്തെ ഭൂമിയുടെ ഉടമസ്ഥാവകാശം സംബന്ധിച്ചാണ്. മൗലികമായ പ്രശ്‌നങ്ങള്‍ കോടതിയുടെ മുന്‍പാകെയിരിക്കുന്ന ഘട്ടത്തില്‍ ഒരു മദ്ധ്യസ്ഥതയുടെ പ്രായോഗികതയില്‍ ലീഗിന് സംശയമുണ്ട്.
ബാബരി മസ്ജിദ് ആക്ഷന്‍ കമ്മിറ്റിയും ഈ പ്രശ്‌നങ്ങളുടെ പുതിയ വശങ്ങള്‍ ചര്‍ച്ച ചെയ്യാന്‍ ഉടനെ യോഗം ചേരുന്നുണ്ട്. അതിന്റെ നിലപാടുകളോടും ലീഗ് യോജിച്ച് നില്‍ക്കുമെന്നും അദ്ദേഹം പറഞ്ഞു.