ജിദ്ദ: വ്യാജ എക്‌സിപീരിയന്‍സ് സര്‍ട്ടിഫിക്കറ്റുപയോഗിച്ച് ആരോഗ്യ മന്ത്രാലയത്തിന്റെ കീഴില്‍ ജോലി നേടിയതിനെ തുടര്‍ന്ന് തായിഫ് ജയിലില്‍ കഴിയുന്ന രണ്ട് മലയാളി നഴ്‌സുമാര്‍ മോചന പ്രതീക്ഷയില്‍. ഇവരെ കഴിഞ്ഞ ദിവസം ജിദ്ദ കോണ്‍സുലര്‍ സംഘം സന്ദര്‍ശിച്ചു.
ഒരാള്‍ തടവിലായിട്ട് രണ്ടുമാസമായി. മറ്റൊരാള്‍ ഒരാഴ്ചയും. സമാന കേസില്‍ ഒരു മാസത്തോളം തടവില്‍ കഴിഞ്ഞിരുന്ന മലയാളി നഴ്‌സിന് രണ്ടാഴ്ച മുന്‍പ് ഉപാധികളോടെ ജാമ്യം ലഭിച്ചിരുന്നു. നിയമസഹായത്തിന് രംഗത്തുള്ള സി.സി.ഡബ്ല്യൂ പ്രതിനിധി മുഹമ്മദ് സാലിയും ആരോഗ്യ മന്ത്രാലയത്തിലെ ഉന്നത ഉദ്യോഗസ്ഥനുമാണ് നഴ്‌സിന് വേണ്ടി ജാമ്യം നിന്നത്.
ഇവരുടെ കേസ് നടത്താന്‍ കോണ്‍സുലേറ്റില്‍ നിന്നും സാലിക്ക് അനുമതി പത്രം നല്‍കിയിരുന്നു. കേസ് അവസാനിച്ചാല്‍ മാത്രമേ നാട്ടിലേക്ക് പോകാന്‍ സാധിക്കുകയുള്ളൂവെന്ന് സാലി പറഞ്ഞു. കേസില്‍പ്പെട്ട മൂവരും കോട്ടയം പാല സ്വദേശികളാണ്. രണ്ടുപേര്‍ ഒരു വര്‍ഷം ജോലി നോക്കി നാട്ടില്‍പോയി തിരിച്ച് വന്നവരാണ്. കോണ്‍സുലര്‍ സംഘം ഒരു മണിക്കൂറോളം തടവില്‍ കഴിയുന്ന മലയാളി നഴ്‌സുമാരുമായി കൂടിക്കാഴ്ച നടത്തി വിവരങ്ങള്‍ ശേഖരിച്ചു. മോചനത്തിന് വേണ്ട നിയമനടപടികളുമായി മുന്നോട്ട് പോകുമെന്ന് സംഘം പറഞ്ഞു. ജാമ്യത്തിലിറങ്ങിയ നഴ്‌സിനെയും കോണ്‍സുലര്‍ സംഘം സന്ദര്‍ശിച്ചു.
വൈസ് കോണ്‍സുല്‍ ആസിഫ് സയ്യീദ്, അസീം മുഹമ്മദ് എന്നിവരാണ് സന്ദര്‍ശനത്തിനെത്തിയത്.
തായിഫ് ഗവര്‍ണറേറ്റും സംഘം സന്ദര്‍ശിച്ച് ഉദ്യോഗസ്ഥരുമായി ചര്‍ച്ച നടത്തി. നാട്ടില്‍ നിന്നും ഏജന്റുമാരാണ് ഇവര്‍ക്ക് സര്‍ട്ടിഫിക്കറ്റ് സംഘടിപ്പിച്ചു നല്‍കിയത്.