മൂവാറ്റുപുഴ: പായിപ്ര കിണറുപടിക്ക് സമീപം കുടിവെള്ള പൈപ്പ് പൊട്ടി ലക്ഷക്കണക്കിന് ലിറ്റര്‍ കുടിവെള്ളം പാഴാകുന്നു. കഴിഞ്ഞ രണ്ടാഴ്ചയായി കുടിവെള്ളപൈപ്പ് പൊട്ടി റോഡിലൂടെ വെള്ളം ഒഴുകാന്‍ തുടങ്ങിയിട്ടെങ്കിലും ഇതുവരെ ആരും തിരിഞ്ഞ് നോക്കിയിട്ടില്ല. ഇതേ തുടര്‍ന്ന് പായിപ്ര മാനാറിയില്‍ മേഖലയില്‍ ഉയര്‍ന്ന പ്രദേശങ്ങളില്‍ കുടിവെള്ളം കിട്ടാകനിയായി മാറി.
ജപ്പാന്‍ കുടിവെള്ള പദ്ധതിയിലൂടെയാണ് ഈ പ്രദേശങ്ങളില്‍ കുടിവെള്ളം എത്തിക്കുന്നത്. പൈപ്പ് പൊട്ടി ഉയര്‍ന്ന പ്രദേശത്തുള്ളവരുടെ കുടിവെള്ള ലഭ്യത മുടങ്ങിയ വിവരം വാട്ടര്‍ അതോററ്റിയെ അറിയിച്ചെങ്കിലും നടപടി സ്വീകരിച്ചിട്ടില്ല. ഇപ്പോള്‍ പൊട്ടിയസ്ഥലത്ത് പൊങ്ങുന്നവെള്ളത്തിന് പാല്‍ കളര്‍ കാണുന്നതായും നാട്ടുകാര്‍ പറയുന്നു. വിലകുറഞ്ഞതും, ഈട് നില്‍പ് കുറഞ്ഞതുമായ പൈപ്പുകളായതിനാലാണ് ഇടക്കിടെ പൊട്ടികൊണ്ടിരിക്കുന്നത്. എന്നാല്‍ അതു പരിഹരിക്കുവാന്‍ വേണ്ട നടപടി യഥാസമയം വാട്ടര്‍ അതോറിറ്റി കൈ കൊളളുന്നില്ലെന്നതാണ് നാട്ടുകാരുടെ പരാതി. കുടിവെള്ളം പൊട്ടിയസ്ഥലത്ത് അറ്റകുറ്റപണി നടത്തിയില്ലെങ്കില്‍ പൈപ്പിന്റെ പൊട്ടിയ സ്ഥാനത്ത് വികാസം ഉണ്ടായി കൂടുതല്‍ ശുദ്ധജലം പുറത്തേക്ക് ഒഴുകന്നതോടെ താഴ്ന്ന പ്രദേശത്തും കുടിവെള്ളം കിട്ടാതെ വരും. ഇതോടെ ജനങ്ങളുടെ പ്രതിഷേധം ശക്തമാകുമെന്ന് നാട്ടുകാര്‍ മുന്നറിയിപ്പ് നല്‍കി.