തിരൂര്‍: കേരളാ പ്രീമിയര്‍ ലീഗ് മത്സരത്തില്‍ ഇന്ന് സാറ്റ് -കേരളാ ബ്ലാസ്റ്റേഴ്‌സ് റിസര്‍വ് ടീം ഇന്ന് ഏറ്റുമുട്ടും. വൈകിട്ട് നാലിന് തിരൂര്‍ താഴെപ്പാലത്തെ രാജീവ് ഗാന്ധി സ്മാരക സ്റ്റേഡിയത്തിലാണ് നിര്‍ണായക കളി. ആറ് കളികളിലായി തിരൂര്‍ സാറ്റ് ടീമിനു അഞ്ച് ജയവും ഒരു സമനിലയുമായി 16 പോയിന്റുള്ളപ്പോള്‍ കേരളാ ബ്ലാസ്റ്റേഴ്‌സിന് നാല് കളികളിലായി ആറ് പോയിന്റുണ്ട്.
ഇനിയുള്ള നാല് കളികള്‍ ബ്ലാസ്റ്റേഴ്‌സ് ജയിക്കുകയാണെങ്കില്‍ ഗ്രൂപ്പ് എ യില്‍ 19 പോയിന്റുള്ള എഫ്.സി തൃശൂരിനോപ്പം 18 പോയിന്റോടെ ബ്ലാസ്റ്റേഴ്‌സ് സെമി ബര്‍ത് ഉറപ്പിക്കും. മറിച്ച് സാറ്റിന് ഇനിയുള്ള രണ്ട് മത്സരങ്ങളില്‍ ഒരു സമനിലയെങ്കിലും കിട്ടിയാലും ബ്ലാസ്റ്റേഴ്‌സിന് നാല് കളികളില്‍ ഒരു പരാജയമോ സമനിലയോ കിട്ടിയാലും സെമിഫൈനല്‍ ബര്‍ത് സാറ്റിന് ഉറപ്പിക്കാം. കഴിഞ്ഞ വര്‍ഷത്തെ സാറ്റിന്റ മധ്യനിര താരം ഡല്‍ഹി യുനൈറ്റഡിന്റെ റിഷാദ്, ലോസ്‌കര്‍ കാശ്മീര്‍ താരം ഷിബിലി, മഹാരാഷ്ട്ര സന്തോഷ് ട്രോഫി താരം സുബൈര്‍ ദേശായി എന്നിവര്‍ കൂടി നാളെ സാറ്റിന്റെ നിരയില്‍ എത്തുന്നതോടെ റമദാനിലെ ആദ്യ മത്സരം തീ പാറുമെന്നുറപ്പാണ്.