വാഗമണ്‍: മണിപ്പൂരിലെ സുരക്ഷാ സൈനികര്‍ക്ക് ആരെയും പിടിച്ചു കൊണ്ട് പോകാന്‍ അനുവാദം നല്‍കുന്ന അഫ്‌സ്പ നിയമത്തിനെതിരേ താന്‍ നടത്തിയ 16 വര്‍ഷം നീണ്ട നിരാഹാര സമരം എല്ലാ ജനതയ്ക്കും പ്രചോദനമാകട്ടെ എന്ന് മണിപ്പൂരിന്റെ ഉരുക്ക് വനിത ഇറോം ശര്‍മിള. സംസ്ഥാന യുവജന ക്ഷേമ ബോര്‍ഡിന്റെ നേതൃത്വത്തില്‍ വാഗമണില്‍ തുടങ്ങിയ മൂന്ന് ദിവസത്തെ വനിത ശില്‍പശാല ഉദ്ഘാടനം ചെയ്ത് വാഗമണ്ണില്‍ സംസാരിക്കുകയായിരുന്നു ഇറോം. സമൂഹത്തില്‍ സമാധാനം നിലനിര്‍ത്തേണ്ടവരും സംരംക്ഷകരാവേണ്ടതും സ്ത്രീകളാണ്.
വാഗമണിലെ ഉദ്ഘാടന ചടങ്ങില്‍ പങ്കെടുക്കാന്‍ എത്തിച്ചേര്‍ന്ന സത്രീകളെ കാണുമ്പോള്‍ അത് തനിക്ക് വലിയ പ്രചോദനം നല്‍കുന്നതായി ഇറോം ശര്‍മിള പറഞ്ഞു. കേരളത്തിലെ സ്ത്രീകള്‍ ലോകത്തിന് തന്നെ മാതൃകയാണ്. സമൂഹത്തെയും പ്രകൃതിയെയും ദ്രോഹിക്കുന്ന വിധത്തില്‍ നടക്കുന്ന പ്രവര്‍ത്തനങ്ങള്‍ കണ്ടില്ലെന്ന് നടിക്കാതെ പ്രതികരിക്കുന്നവരാകണം ഓരോ സ്ത്രീയും. തന്റെ സമരമാര്‍ഗങ്ങള്‍ ഒരോ സ്ത്രീക്കും പ്രതികരണശേഷി നല്‍കുന്ന പ്രചോദനമാവണം. ലക്ഷ്യത്തിലെത്തി സമൂഹത്തിന്റെ ഹൃദയങ്ങള്‍ കീഴടക്കാന്‍ സ്ത്രീകള്‍ക്ക് കഴിയുമെന്ന് അവര്‍ പറഞ്ഞു.
സംസ്ഥാന യുവജന ക്ഷേമ ബോര്‍ഡ് വൈസ് ചെയര്‍മാന്‍ പി. ബിജു അധ്യക്ഷത വഹിച്ചു. ഇ.എസ് ബിജിമോള്‍ എം.എല്‍എ, യുവജന ക്ഷേമബോര്‍ഡ് അംഗം ഡീന്‍ കുര്യാക്കോസ്, ഏലപ്പാറ പഞ്ചായത്ത് പ്രസിഡന്റ് ഷാജി കുറ്റിക്കാട്ടില്‍, ജില്ലാ പഞ്ചായത്ത് അംഗങ്ങളായ മോളി ഡൊമിനിക്, സിറിയക് തോമസ്, പഞ്ചായത്ത് വൈസ് പ്രസിഡന്റ് എന്‍.സുധാകരന്‍, മെംബര്‍ മിനി സുധാകരന്‍ എന്നിവര്‍ പ്രസംഗിച്ചു.
വര്‍ത്തമാന കാലത്തെ സ്ത്രീ പ്രസക്തിയും പ്രതിസന്ധിയും എന്ന വിഷയത്തില്‍ കെ.കെ ഷാഹിന, ഡോ. ബിജു, ഡോ. എം.എസ്. സുനില്‍, നിലീന അത്തോളി എന്നിവര്‍ ക്ലാസ് നയിച്ചു. ഇന്ന് രാവിലെ 10 ന് കലയിലെ സ്ത്രീ സങ്കല്‍പ്പവും യാഥാര്‍ഥ്യവും എന്ന വിഷയത്തില്‍ ആര്യ ഗോപി, പി.വി ഷാജികുമാര്‍, മൂന്നിനു സ്ത്രീ സ്വാതന്ത്ര്യവും സദാചാരവും എന്ന വിഷയത്തില്‍ ഹര്‍ഷന്‍, സൂര്യ, ഹിമശങ്കര്‍, നവമാധ്യങ്ങളിലെ എഴുത്ത് എന്ന വിഷയത്തില്‍ പി.എം മനോജ്, ഇ. സനീഷ്, ലിജിഷ, ബി.എസ് ജോയി എന്നിവരും ക്ലാസ് നയിക്കും. 23 നു 10 നു സ്ത്രീയും ഫാസിസവും സമകാലീന ഇന്ത്യയും എന്ന വിഷയത്തില്‍ നടക്കുന്ന സെമിനാര്‍ ഡോ. സെബാസ്റ്റ്യന്‍ പോള്‍ നയിക്കും.